Второе послание с-таго апостола Павла Коринфянам. 1
1 Павел, посланник Иисус Христов волею Божиею, и Тимофей брат, церкви Божией сущей в Коринфе, со святыми всеми сущими во всей Ахаии:
2 благодать вам и мир от Бога Отца нашего, и Господа Иисуса Христа.
3 Благословен Бог и Отец Господа нашего Иисуса Христа, Отец щедрот и Бог всякия утехи,
4 утешаяй нас о всяцей скорби нашей, яко возмощи нам утешити сущыя во всяцей скорби, утешением, имже утешаемся сами от Бога.
5 Зане якоже избыточествуют страдания Христова в нас, тако Христом избыточествует и утешение наше.
6 Аще ли же скорбим, о вашем утешении и спасении, действующемся в терпении техже страданий, яже и мы страждем:
7 и упование наше известно о вас. Аще ли утешаемся, о вашем утешении и спасении, ведяще, зане якоже общницы есте страстем нашым, такожде и утешению.
8 Не бо хощем вас, братие, не ведети о скорби нашей бывшей нам во Асии, яко по премногу и паче силы отяготихомся, яко не надеятися нам и жити.
9 Но сами в себе осуждение смерти имехом, да не надеющеся будем на ся, но на Бога возставляющаго мертвыя,
10 Иже от толикия смерти избавил ны есть и избавляет, Наньже и уповахом, яко и еще избавит,
11 споспешествующым и вам по нас молитвою, да от многих лиц, еже в нас дарование, многими благодарится о вас.
12 Похваление бо наше сие есть, свидетельство совести нашея, яко в простоте и чистоте Божией, а не в мудрости плоти, но благодатию Божиею жихом в мире, множае же у вас.
13 Не иная бо пишем вам, но яже чтете и разумеваете: уповаю же, яко и до конца уразумеете,
14 якоже и разуместе нас от части, яко похваление вам есмы, якоже и вы нам, в день Господа нашего Иисуса Христа.
15 И сим упованием хотех к вам приити прежде, да вторую благодать имате,
16 и вами проити в Македонию, и паки от Македонии приити к вам, и вами проводитися во Иудею.
17 Сие же хотя, еда что убо легкотою деях? Или яже совещаваю, по плоти совещаваю, да будет у мене еже ей, ей, и еже ни, ни.
18 Верен же Бог, яко слово наше, еже к вам, не бысть ей и ни.
19 Ибо Божий Сын Иисус Христос, иже у вас нами проповеданный, мною и Силуаном и Тимофеем, не бысть ей и ни, но в Нем Самем ей бысть:
20 елика бо обетования Божия, в Том ей и в Том аминь: Богу к славе нами.
21 Извествуяй же нас с вами во Христа и помазавый нас, Бог,
22 Иже и запечатле нас, и даде обручение Духа в сердца наша.
23 Аз же свидетеля Бога призываю на мою душу, яко щадя вас, ктому не приидох в Коринф,
24 не яко обладаем верою вашею, но (яко) споспешницы есмы вашей радости: верою бо стоите. 2
1 Судих же в себе сие, не паки скорбию к вам приити.
2 Аще бо аз скорбь творю вам, то кто есть веселяяй мя, точию приемляй скорбь от мене?
3 И писах вам сие истое, да не пришед скорбь на скорбь прииму, о нихже подобаше ми радоватися, надеяся на вся вы, яко моя радость всех вас есть.
4 От печали бо многия и туги сердца написах вам многими слезами, не яко да оскорбитеся, но любовь да познаете, юже имам изобильно к вам.
5 Аще ли кто оскорбил мене, не мене оскорби, но от части, да не отягчу, всех вас.
6 Довольно бо таковому запрещение сие, еже от многих:
7 темже сопротивное паче вы да даруете и утешите, да не како многою скорбию пожерт будет таковый:
8 темже молю вы, утвердите к нему любовь.
9 На сие бо и писах, да разумею искусство ваше, аще во всем послушливи есте.
10 Емуже аще что даруете, и аз: ибо аз аще что даровах, емуже даровах, вас ради, о лицы Иисус Христове,
11 да не обидими будем от сатаны: не не разумеваем бо умышлений его.
12 Пришед же в Троаду во благовестие Христово, и двери отверзене ми бывшей о Господе,
13 не имех покоя духу моему, не обретшу ми Тита брата моего: но отрекся им, изыдох в Македонию.
14 Богу же благодарение, всегда победители нас творящему о Христе Иисусе и воню разума Его являющу нами во всяцем месте.
15 Яко Христово благоухание есмы Богови в спасаемых и в погибающих.
16 Овем убо воня смертная в смерть, овем же воня животная в живот. И к сим кто доволен?
17 Несмы бо, якоже мнози, нечисто проповедающии слово Божие, но яко от чистоты, но яко от Бога, пред Богом, во Христе глаголем. 3
1 Зачинаем ли паки нас самех извещавати вам? Или требуем, якоже нецыи, извещавательных посланий к вам, или от вас известительных?
2 Послание бо наше вы есте, написаное в сердцах наших, знаемое и прочитаемое от всех человек:
3 являеми, яко есте послание Христово служеное нами, написано не чернилом, но Духом Бога жива, не на скрижалех каменных, но на скрижалех сердца плотяных.
4 Надеяние же таково имамы Христом к Богу,
5 не яко довольни есмы от себе помыслити что, яко от себе, но доволство наше от Бога:
6 иже и удоволи нас служители быти Нову Завету, не писмени, но духу: писмя бо убивает, а дух животворит.
7 Аще ли служение смерти писмены, образовано в каменех, бысть в славу, яко не мощи взирати сыном Израилевым на лице Моисеово, славы ради лица его престающия.
8 Како не множае паче служение духа будет в славе?
9 Аще бо служение осуждения, слава, много паче избыточествует служение правды в славе.
10 Ибо не прославися прославленное в части сей, за превосходящую славу.
11 Аще бо престающее, славою: много паче пребывающее, в славе.
12 Имуще убо таково упование, многим дерзновением действуем,
13 и не якоже Моисей полагаше покрывало на лицы своем, за еже не мощи взирати сыном Израилевым на конец престающаго.
14 Но ослепишася помышления их: даже бо до сего дне тожде покрывало во чтении Ветхаго Завета пребывает не откровено, зане о Христе престает.
15 Но даже до днесь, внегда чтется Моисей, покрывало на сердце их лежит:
16 внегда же обратятся ко Господу, взимается покрывало.
17 Господь же Дух есть: а идеже Дух Господень, ту свобода.
18 Мы же вси откровенным лицем славу Господню взирающе, в тойже образ преобразуемся от славы в славу, якоже от Господня Духа. 4
1 Сего ради имуще служение сие, якоже помиловани быхом, не стужаем си:
2 но отрекохомся тайных срама, не в лукавствии ходяще, ни льстяще словесе Божия, но явлением истины представляюще себе ко всяцей совести человечестей, пред Богом.
3 Аще ли же есть покровено благовествование наше, в гибнущих есть покровено,
4 в нихже бог века сего ослепи разумы неверных, во еже не возсияти им свету благовествования славы Христовы, Иже есть образ Бога невидимаго.
5 Не себе бо проповедаем, но Христа Иисуса Господа: себе же самех рабов вам Иисуса Господа ради:
6 яко Бог рекий из тмы свету возсияти, иже возсия в сердцах наших, к просвещению разума славы Божия о лицы Иисус Христове.
7 Имамы же сокровище сие в скудельных сосудех, да премножество силы будет Божия, а не от нас:
8 во всем скорбяще, но не стужающе си: нечаеми, но не отчаяваеми:
9 гоними, но не оставляеми: низлагаеми, но не погибающе:
10 всегда мертвость Господа Иисуса в теле носяще, да и живот Иисусов в теле нашем явится.
11 Присно бо мы живии в смерть предаемся Иисуса ради, да и живот Иисусов явится в мертвенней плоти нашей:
12 темже смерть убо в нас действует, а живот в вас.
13 Имуще же тойже дух веры, по писанному: веровах, темже возглаголах: и мы веруем, темже и глаголем,
14 ведяще, яко Воздвигий Господа Иисуса, и нас со Иисусом воздвигнет, и предпоставит с вами.
15 Вся бо вас ради, да благодать умножившаяся, множайшими благодарении избыточествит в славу Божию.
16 Темже не стужаем си: но аще и внешний наш человек тлеет, обаче внутренний обновляется по вся дни.
17 Еже бо ныне легкое печали нашея, по преумножению в преспеяние тяготу вечныя славы соделовает нам,
18 не смотряющым нам видимых, но невидимых: видимая бо временна, невидимая же вечна. 5
1 Вемы бо, яко аще земная наша храмина тела разорится, создание от Бога имамы, храмину нерукотворену, вечну на небесех.
2 Ибо о сем воздыхаем, в жилище наше небесное облещися желающе:
3 аще точию и облекшеся, не нази обрящемся.
4 Ибо сущии в теле сем воздыхаем отягчаеми, понеже не хощем совлещися, но пооблещися, да пожерто будет мертвенное животом.
5 Сотворивый же нас в сие истое Бог, Иже и даде нам обручение Духа.
6 Дерзающе убо всегда и ведяще, яко живуще в теле отходим от Господа:
7 верою бо ходим, а не видением:
8 дерзаем же и благоволим паче отити от тела и внити ко Господу:
9 темже и тщимся, аще входяще, аще отходяще, благоугодни Ему быти:
10 всем бо явитися нам подобает пред судищем Христовым, да приимет кийждо, яже с телом содела, или блага, или зла.
11 Ведуще убо страх Господень, человеки увещаваем, Богови же явлени есмы: уповаем же, яко и в совестех ваших явлени есмы.
12 Не паки бо себе хвалим пред вами, но вину даем вам похвалению о нас, да имате к хвалящымся в лицы, а не в сердцы.
13 Аще бо изумихомся, Богови: аще ли целомудрствуем, вам.
14 Ибо любы Божия обдержит нас суждших сие: яко аще един за всех умре, то убо вси умроша.
15 Христос же за всех умре, да живущии не ктому себе живут, но умершему за них и воскресшему.
16 Темже и мы отныне ни единаго вемы по плоти: аще же и разумехом по плоти Христа, но ныне ктому не разумеем.
17 Темже аще кто во Христе, нова тварь: древняя мимоидоша, се быша вся нова:
18 всяческая же от Бога, примирившаго нас Себе Иисус Христом и давшаго нам служение примирения:
19 зане Бог бе во Христе мир примиряя Себе, не вменяя им согрешений их и положив в нас слово примирения.
20 По Христе убо молим, яко Богу молящу нами, молим по Христе: примиритеся с Богом.
21 Не ведевшаго бо греха по нас грех сотвори, да мы будем правда Божия о Нем. 6
1 Споспешствующе же и молим, не вотще благодать Божию прияти вам.
2 Глаголет бо: во время приятно послушах тебе, и в день спасения помогох ти. Се ныне время благоприятно, се ныне день спасения.
3 Ни едино ни в чемже дающе претыкание, да служение безпорочно будет,
4 но во всем представляюще себе якоже Божия слуги, в терпении мнозе, в скорбех, в бедах, в теснотах,
5 в ранах, в темницах, в нестроениих, в трудех, во бдениих, в пощениих,
6 во очищении, в разуме, в долготерпении, в благости, в Дусе Святе, в любви нелицемерне,
7 в словеси истины, в силе Божией, оружии правды десными и шуими,
8 славою и безчестием, гаждением и благохвалением: яко лестцы, и истинни:
9 яко незнаеми, и познаваеми: яко умирающе, и се живи есмы: яко наказуеми, а не умерщвляеми:
10 яко скорбяще, присно же радующеся: яко нищи, а многи богатяще: яко ничтоже имуще, а вся содержаще.
11 Уста наша отверзошася к вам, Коринфяне, сердце наше распространися.
12 Не тесно вмещаетеся в нас, утесняетеся же во утробах ваших.
13 Тожде же возмездие, якоже чадом глаголю, распространитеся и вы.
14 Не бывайте удобь преложни ко иному ярму, якоже невернии. Кое бо причастие правде к беззаконию? Или кое общение свету ко тьме?
15 Кое же согласие Христови с Велиаром? Или кая часть верну с неверным?
16 Или кое сложение церкви Божией со идолы? Вы бо есте церкви Бога жива, якоже рече Бог: яко вселюся в них и похожду, и буду им Бог, и тии будут Мне людие.
17 Темже изыдите от среды их и отлучитеся, глаголет Господь, и нечистоте не прикасайтеся, и Аз прииму вы:
18 и буду вам во Отца, и вы будете Мне в сыны и дщери, глаголет Господь Вседержитель. 7
1 Сицева убо имуще обетования, о возлюбленнии, очистим себе от всякия скверны плоти и духа, творяще святыню в страсе Божии.
2 Вместите ны: ни единаго обидехом, ни единаго истлихом, ни единаго лихоимствовахом.
3 Не на осуждение глаголю: прежде бо рех, яко в сердцах наших есте, во еже умрети с вами и сожити.
4 Много ми дерзновение к вам, многа ми похвала о вас: исполнихся утехи, преизбыточествую радостию о всяцей печали нашей.
5 Ибо пришедшым нам в Македонию, ни единаго име покоя плоть наша, но во всем скорбяще: внеуду брани, внутрьуду боязни.
6 Но утешаяй смиренныя, утеши нас Бог пришествием Титовым,
7 не токмо же пришествием его, но и утешением, имже утешися о вас, поведая нам ваше желание, ваше рыдание, вашу ревность по мне, яко ми паче возрадоватися.
8 Яко аще и оскорбих вас посланием, не раскаюся, аще и раскаял бых ся: вижду бо, яко послание оно, аще и к часу, оскорби вас.
9 Ныне радуюся, не яко скорбни бысте, но яко оскорбистеся в покаяние: оскорбесте бо по Бозе, да ни в чемже отщетитеся от нас.
10 Печаль бо, яже по Бозе, покаяние нераскаянно во спасение соделовает, а сего мира печаль смерть соделовает.
11 Се бо сие самое, еже по Бозе оскорбитися вам, колико содела в вас тщание? Но ответ? Но негодование, но страх, но вожделение, но ревность, но отмщение? Во всем представисте себе чисты быти в вещи.
12 Аще бо и писах вам, не обидевшаго ради, ниже обидимаго ради, но за еже явитися в вас тщанию нашему, еже о вас пред Богом.
13 Сего ради утешихомся о утешении вашем: лишше же паче возрадовахомся о радости Титове, яко покоися дух его от всех вас:
14 яко аще что ему о вас похвалихся, не посрамихся: но яко вся воистинну глаголахом вам, тако и похваление наше, еже к Титу, истинно бысть:
15 и утроба его излиха к вам есть, воспоминающаго всех вас послушание, яко со страхом и трепетом приясте его.
16 Радуюся убо, яко во всем дерзаю в вас. 8
1 Сказуем же вам, братие, благодать Божию, данную в церквах Македонских:
2 яко во мнозем искушении скорбей избыток радости их, и яже во глубине нищета их избыточествова в богатство простоты их:
3 яко по силе их, свидетельствую, и паче силы доброхотни,
4 со многим молением моляще нас, благодать и общение служения, еже ко святым, прияти нам:
5 и не якоже надеяхомся, но себе вдаша первее Господеви, и нам волею Божиею:
6 во еже умолити нам Тита, да якоже прежде начат, такожде и скончает в вас и благодать сию.
7 Но якоже во всем избыточествуете, верою и словом, и разумом, и всяцем тщанием, и любовию, яже от вас к нам, да и в сей благодати избыточествуете.
8 Не по повелению глаголю, но за иных тщание и вашея любве истинное искушая.
9 Весте бо благодать Господа нашего Иисуса Христа, яко вас ради обнища богат сый, да вы нищетою Его обогатитеся.
10 И совет даю о сем: се бо вам есть на пользу, иже не точию, еже творити, но и еже хотети, прежде начасте от прешедшаго лета.
11 Ныне же и сие творити скончайте, да якоже бысть усердие хотети, тако будет и исполнити от сего, еже имате.
12 Аще бо усердие предлежит, по елику аще кто имать, благоприятен есть, а не по елику не имать.
13 Не бо да иным убо отрада, вам же скорбь: но по изравнению.
14 В нынешнее время ваше избыточествие во онех лишение, да и онех избыток будет в ваше лишение, яко да будет равенство,
15 якоже есть писано: иже многое, не преумножил есть: и иже малое, не умалил.
16 Благодарение же Богови, давшему тожде тщание о вас в сердце Титово:
17 яко моление убо прият, тщаливейший же сый, своею волею изыде к вам.
18 Послахом же с ним и брата, егоже похвала во евангелии по всем церквам:
19 не точию же, но и освящен от церквей с нами ходити, со благодатию сею, служимою нами к Самого Господа славе и усердию вашему:
20 блюдущеся того, да не кто нас поречет во обилии сем служимем нами:
21 промышляюще добрая не токмо пред Богом, но и пред человеки.
22 Послахом же с ними и брата нашего, егоже искусихом во многих многащи встанлива суща, ныне же зело встанливейша, надеянием многим на вас.
23 Аще ли же о Тите, общник мне и к вам споспешник: аще ли братия наша, посланницы церквей, слава Христова.
24 Показание убо любве вашея и нашего хваления о вас, к ним покажите, и в лице церквей. 9
1 О службе бо, яже ко святым, лишше ми есть писати вам,
2 вем бо усердие ваше, имже о вас хвалюся Македоняном, яко Ахаиа приготовися от мимошедшаго лета: и яже от вас ревность раздражи множайших.
3 Послах же братию, да не похваление наше, еже о вас, испразднится в части сей, но да, якоже глаголах, приготовани будете:
4 да не како, аще приидут со мною Македоняне и обрящут вас неприготованных, постыдимся мы, да не глаголем вы, в части сей похваления.
5 Потребно убо умыслих умолити братию, да прежде приидут к вам и предуготовят прежде возвещенное благословение ваше, сие готово быти тако, якоже благословение, а не яко лихоимство.
6 Се же глаголю: сеяй скудостию, скудостию и пожнет: а сеяй о благословении, о благословении и пожнет.
7 Кийждо якоже изволение имать сердцем, не от скорби, ни от нужды: доброхотна бо дателя любит Бог.
8 Силен же Бог всяку благодать изюбиловати в вас, да о всем всегда всяко довольство имуще, избыточествуете во всяко дело благо,
9 якоже есть писано: расточи, даде убогим: правда его пребывает во век века.
10 Даяй же семя сеющему и хлеб в снедь, да подаст и умножит семя ваше, и да возрастит жита правды вашея,
11 да о всем богатящеся во всяку простоту, яже содевает нами благодарение Богу.
12 Яко работа сего служения не токмо есть исполняющая лишения святых, но и избыточествующая многими благодареньми Богови:
13 искушением служения сего славяще Бога о покорении исповедания вашего в Благовествовании Христове, и о простоте союбщения к ним и ко всем,
14 и о тех молитве о вас, возжелеющих вас за премногую благодать Божию на вас.
15 Благодарение же Богови о неисповедимем Его даре. 10
1 Сам же аз Павел молю вы кротостию и тихостию Христовою, иже в лице убо смирен в вас, не сый же у вас дерзаю в вас.
2 Молю же, да не присущ дерзаю надеянием, имже помышляю смети на некия непщующыя нас яко по плоти ходящих.
3 Во плоти бо ходяще, не по плоти воинствуем:
4 оружия бо воинства нашего не плотская, но сильна Богом на разорение твердем: помышления низлагающе,
5 и всяко возношение взимающееся на разум Божий, и пленяюще всяк разум в послушание Христово,
6 и в готовости имуще отмстити всяко преслушание, егда исполнится ваше послушание.
7 Иже ли пред лицем, зрите? Аще кто надеется себе Христова быти, да помышляет паки от себе, зане, якоже он Христов, такожде и мы Христовы.
8 Аще бо и лишше что похвалюся о власти нашей, юже даде нам Господь в создание, а не на разорение ваше, не постыжуся.
9 Но да не явлюся, яко страшя вас посланьми.
10 Яко послания убо, рече, тяжка и крепка, а пришествие тела немощно, и слово уничиженно:
11 сие да помышляет таковый, яко яцы же есмы словом посланий, отстояще, таковии и ту суще есмы делом.
12 Не смеем бо судити, или прикладовати себе иным хвалящым себе самех: но сами в себе себе измеряюще, и прилагающе себе самим себе, не разумевают.
13 Мы же не в безмерная похвалимся, но по мере правила, егоже раздели нам Бог меру, достизати даже и до вас.
14 Не яко бо не досяжуще до вас, паче простираем себе, даже бо и до вас достигохом благовестием Христовым:
15 не в безмерная хвалящеся в чуждих трудех, упование же имуще, растущей вере вашей, в вас величатися по правилу нашему изобильно,
16 во еже и в дальших вас странах благовестити, не чужим правилом в готовых похвалитися.
17 Хваляйся же, о Господе да хвалится:
18 не хваляй бо себе сей искусен, но егоже Бог восхваляет. 11
1 О, да бысте мало потерпели безумию моему! Но и потерпите мя.
2 Ревную бо по вас Божиею ревностию: обручих бо вас единому мужу деву чисту представити Христови.
3 Боюся же, да не како, якоже змий Еву прельсти лукавством своим, тако истлеют и разумы ваши от простоты, яже о Христе.
4 Аще бо грядый инаго Иисуса проповедает, егоже не проповедахом, или Духа инаго приемлете, егоже не приясте, или благовествование ино, еже не приясте, добре бысте потерпели.
5 Непщую бо ничимже лишитися предних Апостол:
6 аще бо и невежда словом, но не разумом: но везде явльшеся о всем в вас.
7 Или грех сотворих себе смиряя, да вы вознесетеся, яко туне Божие Благовествование благовестих вам?
8 От иных церквей уях, приим оброк к вашему служению: и пришед к вам, и в скудости быв, не стужих ни единому:
9 скудость бо мою исполниша братия, пришедше от Македонии: и во всем без стужения вам себе соблюдох и соблюду.
10 Есть истина Христова во мне, яко похваление сие не заградится о мне в странах Ахайских.
11 Почто? Зане не люблю ли вас? Бог весть. А еже творю, и сотворю,
12 да отсеку вину хотящым вины, да, о немже хвалятся, обрящутся якоже и мы.
13 Таковии бо лживи апостоли, делателе льстивии, преобразующеся во Апостолы Христовы.
14 И не дивно: сам бо сатана преобразуется во Ангела светла:
15 не велие убо, аще и служителие его преобразуются яко служители правды: имже кончина будет по делом их.
16 Паки глаголю: да никтоже мнит мя безумна быти: аще ли ни, поне яко безумна приимите мя, да и аз мало что похвалюся.
17 А еже глаголю, не глаголю по Господе, но яко в безумии в сей части похвалы:
18 понеже мнози хвалятся по плоти, и аз похвалюся.
19 Любезно бо приемлете безумныя, мудри суще:
20 приемлете бо, аще кто вас порабощает, аще кто поядает, аще кто не влепоту проторит, аще кто по лицу биет вы, аще кто величается.
21 По досаждению глаголю, зане аки мы изнемогохом. О немже аще дерзает кто, несмысленно глаголю, дерзаю и аз.
22 Еврее ли суть? И аз. Израилите ли суть? И аз. Семя Авраамле ли суть? И аз.
23 Служителие ли Христовы суть? Не в мудрости глаголю, паче аз. В трудех множае, в ранах преболе, в темницах излиха, в смертех многащи.
24 От Иудей пять краты четыредесять разве единыя приях:
25 трищи палицами биен бых, единою каменьми наметан бых, трикраты корабль опровержеся со мною: нощь и день во глубине сотворих:
26 в путных шествиих множицею: беды в реках, беды от разбойник, беды от сродник, беды от язык, беды во градех, беды в пустыни, беды в мори, беды во лжебратии:
27 в труде и подвизе, во бдениих множицею, во алчбе и жажди, в пощениих многащи, в зиме и наготе.
28 Кроме внешних, нападение еже по вся дни, и попечение всех церквей.
29 Кто изнемогает, и не изнемогаю? Кто соблазняется, и аз не разжизаюся?
30 Аще хвалитися ми подобает, о немощи моей похвалюся.
31 Бог и Отец Господа нашего Иисуса Христа весть, сый благословен во веки, яко не лгу.
32 В Дамасце языческий князь Арефы царя стрежаше Дамаск град, яти мя хотя: и оконцем в кошнице свешен бых по стене, и избегох из руку его. 12
1 Похвалитися же не пользует ми: прииду бо в видения и откровения Господня.
2 Вем человека о Христе, прежде лет четыренадесяти: аще в теле, не вем, аще ли кроме тела, не вем, Бог весть: восхищена бывша таковаго до третияго небесе.
3 И вем такова человека: аще в теле, или кроме тела, не вем: Бог весть:
4 яко восхищен бысть в рай, и слыша неизреченны глаголголы, ихже не леть есть человеку глаголати.
5 О таковем похвалюся: о себе же не похвалюся, токмо о немощех моих.
6 Аще бо восхощу похвалитися, не буду безумен, истину бо реку: жажду же, да не како кто вознепщует о мне паче, еже видит мя, или слышит что от мене.
7 И за премногая откровения да не превозношуся, дадеся ми пакостник плоти, аггел сатанин, да ми пакости деет, да не превозношуся.
8 О сем трикраты Господа молих, да отступит от мене,
9 и рече ми: довлеет ти благодать Моя: сила бо Моя в немощи совершается. Сладце убо похвалюся паче в немощех моих, да вселится в мя сила Христова.
10 Темже благоволю в немощех, в досаждениих, в бедах, во изгнаниих, в теснотах по Христе: егда бо немощствую, тогда силен есмь.
11 Бых несмыслен хваляся: вы мя понудисте. Аз бо должен бех от вас хвалимь бывати: ничимже бо лишихся первейших Апостол, аще и ничтоже есмь:
12 знамения бо Апостолова содеяшася в вас во всяцем терпении, в знамениих и чудесех и силах.
13 Что бо есть, егоже лишистеся паче прочих церквей, разве точию яко аз сам не стужих вам? Дадите ми неправду сию.
14 Се третие готов есмь приити к вам, и не стужу вам: не ищу бо ваших, но вас. Не должна бо суть чада родителем снискати имения, но родителе чадом.
15 Аз же в сладость иждиву и иждивен буду по душах ваших, аще и излишше вас любя, менше любимь есмь.
16 Буди же, аз не отягчих вас, но коварен сый, лестию вас приях.
17 Еда коим от посланных к вам лихоимствовах вас?
18 Умолих Тита, и с ним послах брата: еда лихоимствова чим вас Тит? Не темже ли духом ходихома? Не темиже ли стопами?
19 Паки ли мните, яко ответ вам творим? Пред Богом, о Христе глаголем: вся же, возлюбленнии, о вашем созидании и утверждении.
20 Боюся же, еда како пришед, не яцех же хощу, обрящу вас, и аз обрящуся вам, якова же не хощете: да не како будут рвения, зависти, ярости, рети, клеветы, шептания, кичения, нестроения:
21 да не паки пришедша мя смирит Бог мой у вас, и восплачуся многих прежде согрешших и не покаявшихся о нечистоте и блужении и студоложствии, яже содеяша. 13
1 Третицею се гряду к вам: при устех двою или триех свидетелей станет всяк глагол.
2 Прежде рех и предглаголю, яко у вас быв второе, и отсутствуя ныне пишу прежде согрешившым и прочым всем, яко аще прииду паки, не пощажду:
3 понеже искушения ищете глаголющаго во мне Христа, Иже в вас не изнемогает, но может в вас:
4 ибо аще и распят бысть от немощи, но жив есть от силы Божия: ибо и мы немощствуем в Нем, но живи будем с Ним от силы Божия в вас:
5 себе искушайте, аще есте в вере: себе искушайте. Или не знаете себе, яко Иисус Христос в вас есть? Разве точию чим неискусни есте.
6 Уповаю же, яко разумети имате, яко мы несмы неискусни.
7 Молимся же к Богу, не сотворити вам ни единаго зла, не яко да мы искусни явимся, но да вы доброе сотворите, мы же яко неискусни будем.
8 Ничтоже бо можем на истину, но по истине.
9 Радуемся бо, егда мы немощствуем, вы же сильни бываете: о сем же и молимся, о вашем совершении.
10 Сего ради не сый у вас сия пишу, да не пришед безщадно сотворю по власти, юже Господь дал ми есть в создание, а не на разорение.
11 Прочее же, братие, радуйтеся, совершайтеся, утешайтеся, тожде мудрствуйте, мир имейте. И Бог любве и мира будет с вами.
12 Целуйте друг друга лобзанием святым.
13 Целуют вы святии вси.
14 Благодать Господа нашего Иисуса Христа, и любы Бога и Отца, и общение Святаго Духа со всеми вами. Аминь.
Первое послание с-таго апостола Павла Коринфянам. 1
1 Павел, зван Апостол Иисус Христов волею Божиею, и Сосфен брат,
2 церкви Божией сущей в Коринфе, освященным о Христе Иисусе, званным святым, со всеми призывающими имя Господа нашего Иисуса Христа, во всяцем месте, тех же и нашем:
3 благодать вам и мир от Бога Отца нашего и Господа Иисуса Христа.
4 Благодарю Бога моего всегда о вас, о благодати Божией данней вам о Христе Иисусе,
5 яко во всем обогатистеся о Нем, во всяцем слове и всяцем разуме,
6 якоже свидетелство Христово известися в вас:
7 яко вам не лишитися ни во единем даровании, чающым откровения Господа нашего Иисуса Христа,
8 Иже и утвердит вас даже до конца неповинных в день Господа нашего Иисуса Христа.
9 Верен Бог, Имже звани бысте во общение Сына Его Иисуса Христа, Господа нашего.
10 Молю же вы, братие, именем Господа нашего Иисуса Христа, да тожде глаголете вси, и да не будут в вас распри, да будете же утверждени в томже разумении и в тойже мысли.
11 Возвестися бо ми о вас, братие моя, (посланным) от Хлоиса, яко рвения в вас суть.
12 Глаголю же се, яко кийждо вас глаголет: аз убо есмь Павлов, аз же Аполлосов, аз же Кифин, аз же Христов.
13 Еда разделися Христос, еда Павел распятся по вас? Или во имя Павлово крестистеся?
14 Благодарю Бога, яко ни единаго от вас крестих, точию Криспа и Гаиа,
15 да не кто речет, яко в мое имя крестих.
16 Крестих же и Стефанинов дом: прочее не вем, аще кого иного крестих.
17 Не посла бо мене Христос крестити, но благовестити, не в премудрости слова, да не испразднится крест Христов.
18 Слово бо крестное погибающым убо юродство есть, а спасаемым нам сила Божия есть.
19 Писано бо есть: погублю премудрость премудрых, и разум разумных отвергу.
20 Где премудр? Где книжник? Где совопросник века сего? Не обуи ли Бог премудрость мира сего?
21 Понеже бо в премудрости Божией не разуме мир премудростию Бога, благоизволил Бог буйстовм проповеди спасти верующих.
22 Понеже и Иудее знамения просят, и Еллини премудрости ищут:
23 мы же проповедуем Христа распята, Иудеем убо соблазн, Еллином же безумие,
24 самем же званным Иудеем же и Еллином Христа, Божию силу и Божию премудрость:
25 зане буее Божие премудрее человек есть, и немощное Божие крепчае человек есть.
26 Видите бо звание ваше, братие, яко не мнози премудри по плоти, не мнози сильни, не мнози благородни:
27 но буяя мира избра Бог, да премудрыя посрамит, и немощная мира избра Бог, да посрамит крепкая:
28 и худородная мира и уничиженная избра Бог, и не сущая, да сущая упразднит,
29 яко да не похвалится всяка плоть пред Богом.
30 Из Негоже вы есте о Христе Иисусе, Иже бысть нам премудрость от Бога, правда же и освящение и избавление,
31 да, якоже пишется: хваляйся, о Господе да хвалится. 2
1 И аз пришед к вам, братие, приидох не по превосходному словеси или премудрости возвещая вам свидетелство Божие:
2 не судих бо ведети что в вас, точию Иисуса Христа, и Сего распята:
3 и аз в немощи и страсе и трепете мнозе бых в вас.
4 И слово мое и проповедь моя не в препретелных человеческия премудрости словесех, но в явлении духа и силы,
5 да вера ваша не в мудрости человечестей, но в силе Божией будет.
6 Премудрость же глаголем в совершенных, премудрость же не века сего, ни князей века сего престающих,
7 но глаголем премудрость Божию, в тайне сокровенную, юже предустави Бог прежде век в славу нашу,
8 юже никтоже от князей века сего разуме: аще бо быша разумели, не быша Господа славы распяли.
9 Но якоже есть писано: ихже око не виде, и ухо не слыша, и на сердце человеку не взыдоша, яже уготова Бог любящым Его.
10 Нам же Бог открыл есть Духом Своим: Дух бо вся испытует, и глубины Божия.
11 Кто бо весть от человек, яже в человеце, точию дух человека, живущий в нем? Такожде и Божия никтоже весть, точию Дух Божий.
12 Мы же не духа мира сего прияхом, но Духа иже от Бога, да вемы яже от Бога дарованная нам,
13 яже и глаголем не в наученых человеческия премудрости словесех, но в наученых Духа Святаго, духовная духовными сразсуждающе.
14 Душевен же человек не приемлет яже Духа Божия: юродство бо ему есть, и не может разумети, зане духовне востязуется.
15 Духовный же востязует убо вся, а сам той ни от единаго востязуется.
16 Кто бо разуме ум Господень, иже изяснит и? Мы же ум Христов имамы. 3
1 И аз, братие, не могох вам глаголати яко духовным, но яко плотяным, яко младенцем о Христе.
2 Млеком вы напоих, а не брашном: ибо не у можасте, но ниже еще можете ныне,
3 еще бо плотстии есте. Идеже бо в вас зависти и рвения и распри, не плотстии ли есте и по человеку ходите?
4 Егда бо глаголет кто: аз убо есмь Павлов, другий же: аз Аполлосов: не плотстии ли есте?
5 Кто убо есть Павел? Кто же ли Аполлос? Но точию служителие, имиже веровасте, и комуждо якоже Господь даде.
6 Аз насадих, Аполлос напои, Бог же возрасти:
7 темже ни насаждаяй есть что, ни напаяяй, но возращаяй Бог.
8 Насаждаяй же и напаяяй едино еста: кийждо же свою мзду приимет по своему труду.
9 Богу бо есмы споспешницы: Божие тяжание, Божие здание есте.
10 По благодати Божией данней мне, яко премудр архитектон основание положих, ин же назидает: кийждо же да блюдет, како назидает.
11 Основания бо инаго никтоже может положити паче лежащаго, еже есть Иисус Христос.
12 Аще ли кто назидает на основании сем злато, сребро, камение честное, дрова, сено, тростие,
13 когождо дело явлено будет: день бо явит, зане огнем открывается: и когождо дело, яковоже есть, огнь искусит.
14 (И) егоже аще дело пребудет, еже назда, мзду приимет:
15 (а) егоже дело сгорит, отщетится: сам же спасется, такожде якоже огнем.
16 Не весте ли, яко храм Божий есте, и Дух Божий живет в вас?
17 Аще кто Божий храм растлит, растлит сего Бог: храм бо Божий свят есть, иже есте вы.
18 Никтоже себе да прельщает: аще кто мнится мудр быти в вас в веце сем, буй да бывает, яко да премудр будет.
19 Премудрость бо мира сего буйство у Бога есть, писано бо есть: запинаяй премудрым в коварстве их.
20 И паки: Господь весть помышления человеческа, яко суть суетна.
21 Темже никтоже да хвалится в человецех, вся бо ваша суть:
22 аще Павел, или Аполлос, или Кифа, или мир, или живот, или смерть, или настоящая, или будущая, вся ваша суть:
23 вы же Христовы, Христос же Божий. 4
1 Тако нас да непщует человек, яко слуг Христовых и строителей таин Божиих:
2 а еже прочее ищется в строителех, да верен кто обрящется.
3 Мне же не велико есть, да от вас истяжуся, или от человеческаго дне: но ни сам себе востязую.
4 Ничесоже бо в себе свем, но ни о сем оправдаюся: востязуяй же мя Господь есть.
5 Темже прежде времене ничтоже судите, дондеже приидет Господь, Иже во свете приведет тайная тмы и объявит советы сердечныя, и тогда похвала будет комуждо от Бога.
6 Сия же, братие (моя), преобразих на себе и Аполлоса вас ради, да от наю научитеся не паче написанных мудрствовати, да не един по единому гордитеся на другаго.
7 Кто бо тя разсуждает? Что же имаши, егоже неси приял? Аще же и приял еси, что хвалишися яко не прием?
8 Се, сыти есте, се, обогатистеся, без нас воцаристеся: и о, дабы воцарилися есте, да и мы быхом с вами цартсвовали.
9 Мню бо, яко Бог ны посланники последния яви, яко насмертники: зане позор быхом миру и Ангелом и человеком.
10 Мы (убо) буи Христа ради, вы же мудри о Христе: мы немощни, вы же крепцы: вы славни, мы же безчестни.
11 До нынешняго часа и алчем, и жаждем, и наготуем, и страждем, и скитаемся,
12 и труждаемся, делающе своими руками. Укоряеми, благословляем: гоними, терпим:
13 хулими, утешаемся: якоже отреби миру быхом, всем попрание доселе.
14 Не срамляя вас сия пишу, но якоже чада моя возлюбленная наказую.
15 Аще бо (и) многи пестуны имате о Христе, но не многи отцы: о Христе бо Иисусе благовествованием аз вы родих.
16 Молю же вас: подобни мне бывайте, якоже аз Христу.
17 Сего ради послах к вам Тимофеа, иже ми есть чадо возлюблено и верно о Господе, иже вам воспомянет пути моя, яже о Христе Иисусе, якоже везде и во всяцей церкви учу.
18 Яко не грядущу ми к вам, разгордешася нецыи:
19 прииду же скоро к вам, аще Господь восхощет, и уразумею не слово разгордевшихся, но силу:
20 не в словеси бо Царство Божие, но в силе.
21 Что хощете? С палицею ли прииду к вам, или с любовию и духом кротости? 5
1 Отнюд слышится в вас блужение, и таково блужение, яковоже ни во языцех именуется, яко некоему имети жену отчую.
2 И вы разгордесте, и не паче плакасте, да измется от среды вас содеявый дело сие.
3 Зане аз убо аще не у вас сый телом, ту же живый духом, уже судих, яко тамо сый: содеявшаго сице сие,
4 о имени Господа нашего Иисуса Христа собравшымся вам и моему духу, с силою Господа нашего Иисуса Христа,
5 предати таковаго сатане во измождение плоти, да дух спасется в день Господа нашего Иисуса Христа.
6 Не добра похвала ваша. Не весте ли, яко мал квас все смешение квасит?
7 Очистите убо ветхий квас, да будете ново смешение, якоже есте безквасни: ибо Пасха наша за ны пожрен бысть Христос.
8 Темже да празднуем не в квасе ветсе, ни в квасе злобы и лукавства, но в безквасиих чистоты и истины.
9 Писах вам в послании не примешатися блудником:
10 и не всяко блудником мира сего, или лихоимцем, или хищником, или идолослужителем, понеже убо должни бы есте были от мира (сего) изыти:
11 ныне же писах вам не примешатися, аще некий, брат именуемь, будет блудник, или лихоимец, или идолослужитель, или досадитель, или пияница, или хищник: с таковым ниже ясти.
12 Что бо ми и внешних судити? Не внутренних ли вы судите?
13 Внешних же Бог судит. И измите злаго от вас самех. 6
1 Смеет ли кто от вас, вещь имея ко иному, судитися от неправедных, а не от святых?
2 Не весте ли, яко святии мирови имут судити? И аще вами суд приимет мир, недостойни есте судищем худым?
3 Не весте ли, яко аггелов судити имамы, а не точию житейских?
4 Житейская бо судища аще имате, уничиженных в церкви, сих посаждаете.
5 К сраму вам глаголю: тако ли несть в вас мудр ни един, иже может разсудити между братий своих?
6 Но брат с братом судится, и то пред неверными.
7 Уже убо отнюд вам срам есть, яко тяжбы имате между собою. Почто не паче обидими есте? Почто не паче лишени бываете?
8 Но вы (сами) обидите и лишаете, да еще братию.
9 Или не весте, яко неправедницы Царствия Божия не наследят? Не льстите себе: ни блудницы, ни идолослужителе, ни прелюбодее, (ни сквернителе,) ни малакии, ни мужеложницы,
10 ни лихоимцы, ни татие, ни пияницы, ни досадителе, ни хищницы Царствия Божия не наследят.
11 И сими (убо) нецыи бесте, но омыстеся, но освятистеся, но оправдистеся именем Господа нашего Иисуса Христа и Духом Бога нашего.
12 Вся ми леть суть, но не вся на пользу: вся ми леть суть, но не аз обладан буду от чего.
13 Брашна чреву, и чрево брашном: Бог же и сие и сия упразднит. Тело же не блужению, но Господеви, и Господь телу.
14 Бог же и Господа воздвиже, и нас воздвигнет силою Своею.
15 Не весте ли, яко телеса ваша удове Христовы суть? Вземь ли убо уды Христовы, сотворю уды блудничи? Да не будет.
16 Или не весте, яко прилепляяйся сквернодейце едино тело есть (с блудодейцею)? Будета бо, рече, оба в плоть едину.
17 Прилепляяйся же Господеви един дух есть (с Господем).
18 Бегайте блудодеяния: всяк (бо) грех, егоже аще сотворит человек, кроме тела есть: а блудяй во свое тело согрешает.
19 Или не весте, яко телеса ваша храм живущаго в вас Святаго Духа суть, Егоже имате от Бога, и несте свои?
20 Куплени бо есте ценою. Прославите убо Бога в телесех ваших и в душах ваших, яже суть Божия. 7
1 А о нихже писасте ми, добро человеку жене не прикасатися.
2 Но блудодеяния ради кийждо свою жену да имать, и каяждо (жена) своего мужа да имать.
3 Жене муж должную любовь да воздает: такожде и жена мужу.
4 Жена своим телом не владеет, но муж: такожде и муж своим телом не владеет, но жена.
5 Не лишайте себе друг друга, точию по согласию до времене, да пребываете в посте и молитве, и паки вкупе собирайтеся, да не искушает вас сатана невоздержанием вашим.
6 Сие же глаголю по совету, (а) не по повелению.
7 Хощу бо, да вси человецы будут, якоже и аз: но кийждо свое дарование имать от Бога, ов убо сице, ов же сице.
8 Глаголю же безбрачным и вдовицам: добро им есть, аще пребудут якоже и аз:
9 аще ли не удержатся, да посягают: лучше бо есть женитися, нежели разжизатися.
10 А оженившымся завещаваю не аз, но Господь: жене от мужа не разлучатися:
11 аще ли же и разлучится, да пребывает безбрачна, или да смирится с мужем (своим): и мужу жены не отпущати.
12 Прочым же аз глаголю, (а) не Господь: аще который брат жену имать неверну, и та благоволит жити с ним, да не оставляет ея:
13 и жена аще имать мужа неверна, и той благоволит жити с нею, да не оставляет его:
14 святится бо муж неверен о жене верне, и святится жена неверна о мужи верне: иначе бо чада ваша нечиста были бы, ныне же свята суть.
15 Аще ли неверный отлучается, да разлучится: не поработися (бо) брат или сестра в таковых: в мир бо призва нас (Господь) Бог.
16 Что бо веси, жено, аще мужа спасеши? Или что веси, мужу, аще жену спасеши?
17 Точию коемуждо якоже разделил есть Бог, кийждо якоже призван бысть Господем, тако да ходит: и тако во всех церквах повелеваю.
18 Во обрезании ли кто призван бысть? Да не отторгнется: в необрезании ли кто призван бысть? Да не обрезуется.
19 Обрезание ничтоже есть, и необрезание ничтоже есть, но соблюдение заповедий Божиих.
20 Кийждо в звании, в немже призван бысть, в том да пребывает.
21 Раб ли призван был еси? Да не нерадиши: но аще и можеши свободен быти, болше поработи себе.
22 Призванный бо о Господе раб, свободник Господень есть: такожде и призванный свободник, раб есть Христов.
23 Ценою куплени есте: не будите раби человеком.
24 Кийждо, в немже призван бысть, братие, в том да пребывает пред Богом.
25 О девах же повеления Господня не имам, совет же даю, яко помилован от Господа верен быти.
26 Мню убо сие добро быти за настоящую нужду, яко добро человеку тако быти.
27 Привязался ли еси жене? Не ищи разрешения. Отрешился ли еси жены? Не ищи жены.
28 Аще ли же и оженишися, не согрешил еси: и аще посягнет дева, не согрешила есть. Скорбь же плоти имети будут таковии: аз же вы щажду.
29 Сие же глаголю, братие, яко время прекращено есть прочее, да и имущии жены, якоже не имущии будут:
30 и плачущиися, якоже не плачущии: и радующиися, якоже не радующеся: и купующии, яко не содержаще:
31 и требующии мира сего, яко не требующе: преходит бо образ мира сего.
32 Хощу же вас безпечальных быти. Не оженивыйся печется о Господних, како угодити Господеви:
33 а оженивыйся печется о мирских, како угодити жене. Разделися жена и дева:
34 непосягшая печется о Господних, како угодити Господеви, да будет свята и телом и духом: а посягшая печется о мирских, како угодити мужу.
35 Сие же на пользу вам самем глаголю: не да сило вам наложу, но к благообразию и благоприступанию Господеви безмолвну.
36 Аще ли же кто безобразити о деве своей непщует, аще есть превозрастна, и тако должна есть быти: еже хощет, да творит: не согрешает, аще посягнет.
37 А иже стоит твердо сердцем, не имый нужды, власть же имать о своей воли, и се разсудил есть в сердцы своем блюсти деву свою, добре творит.
38 Темже и вдаяй браку свою деву добре творит: и не вдаяй лучше творит.
39 Жена привязана есть законом, в елико время живет муж ея: аще же умрет муж ея, свободна есть, за негоже хощет, посягнути, точию о Господе.
40 Блаженнейша же есть, аще тако пребудет, по моему совету: мнюся бо и аз Духа Божия имети. 8
1 О идоложертвенных же вемы: яко вси разум имамы. Разум (убо) кичит, а любы созидает.
2 Аще ли кто мнится ведети что, не у что разуме, якоже подобает разумети:
3 аще же кто любит Бога, сей познан бысть от Него.
4 О ядении же идоложертвенных вемы, яко идол ничтоже есть в мире, и яко никтоже Бог ин, токмо Един.
5 Аще бо и суть глаголемии бози, или на небеси, или на земли: якоже суть бози мнози и господие мнози:
6 но нам един Бог Отец, из Негоже вся, и мы у Него, и един Господь Иисус Христос, Имже вся, и мы Тем.
7 Но не во всех разум: нецыи же совестию идолскою даже доселе якоже идоложертвенное ядят, и совесть их, немощна сущи, сквернится.
8 Брашно же нас не поставляет пред Богом: ниже бо аще ямы, избыточествуем: ниже аще не ямы, лишаемся.
9 Блюдите же, да не како власть ваша сия преткновение будет немощным.
10 Аще бо кто видит тя, имуща разум, в требищи возлежаща, не совесть ли его немощна сущи созиждется идоложертвенная ясти?
11 И погибнет немощный брат в твоем разуме, егоже ради Христос умре.
12 Такожде согрешающе в братию и биюще их совесть немощну сущу, во Христа согрешаете.
13 Темже аще брашно соблазняет брата моего, не имам ясти мяса во веки, да не соблазню брата моего. 9
1 Несмь ли Апостол? Несмь ли свободь? Не Иисуса Христа ли Господа нашего видех? Не дело ли мое вы есте о Господе?
2 Аще иным (и) несмь Апостол, но обаче вам есмь: печать бо моего апостолства вы есте о Господе.
3 Мой ответ востязующым мене сей есть.
4 Еда не имамы власти ясти и пити?
5 Еда не имамы власти сестру жену водити, яко и прочии Апостоли, и братия Господня, и Кифа?
6 Или един аз и Варнава не имамы власти еже не делати?
7 Кто воинствует своими оброки когда? Или кто насаждает виноград, и от плода его не яст? Или кто пасет стадо, и от млека стада не яст?
8 Еда по человеку сия глаголю? Не и закон ли сия глаголет?
9 В Моисеове бо законе писано: да не заградиши устну вола молотяща. Еда о волех радит Бог?
10 Или нас ради всяко глаголет? Нас бо ради написася, яко о надежди должен есть оряй орати, и молотяй с надеждею своего упования причащатися.
11 Аще мы духовная сеяхом вам, велико ли, аще мы ваша телесная пожнем?
12 Аще инии власти вашея причащаются, не паче ли мы? Но не сотворихом по области сей: но вся терпим, да не прекращение кое дамы благовествованию Христову.
13 Не весте ли, яко делающии священная от святилища ядят? (и) служащии олтарю со олтарем делятся?
14 Тако и Господь повеле проповедающым Благовестие от благовестия жити.
15 Аз же ни едино сотворих от сих. Не писах же сия, да тако будет о мне: добрее бо мне паче умрети, нежели похвалу мою кто да испразднит.
16 Аще бо благовествую, несть ми похвалы, нужда бо ми належит: горе же мне есть, аще не благовествую.
17 Аще убо волею сие творю, мзду имам: аще же неволею, строение ми есть предано.
18 Кая убо ми есть мзда? Да благовествуяй без мзды положу Благовестие Христово, во еже не творити ми по области моей в благовествовании.
19 Свободен бо сый от всех, всем себе поработих, да множайшыя приобрящу:
20 бых Иудеем яко Иудей, да Иудеи приобрящу: подзаконным яко подзаконен, да подзаконныя приобрящу:
21 беззаконным яко беззаконен, не сый беззаконник Богу, но законник Христу, да приобрящу беззаконныя.
22 Бых немощным яко немощен, да немощныя приобрящу. Всем бых вся, да всяко некия спасу.
23 Сие же творю за Благовестие, да сообщник ему буду.
24 Не весте ли, яко текущии в позорищи вси убо текут, един же приемлет почесть? Тако тецыте, да постигнете.
25 Всяк же подвизаяйся от всех воздержится: и они убо да истленен венец приимут, мы же неистленен.
26 Аз убо тако теку, не яко безвестно, тако подвизаюся, не яко воздух бияй:
27 но умерщвляю тело мое и порабощаю, да не како, иным проповедуя, сам неключимь буду. 10
1 Не хощу же вас не ведети, братие, яко отцы наши вси под облаком быша, и вси сквозе море проидоша:
2 и вси в Моисеа крестишася во облаце и в мори:
3 и вси тожде брашно духовное ядоша:
4 и вси тожде пиво духовное пиша, пияху бо от духовнаго последующаго камене: камень же бе Христос.
5 Но не во множайших их благоволи Бог, поражени бо быша в пустыни.
6 Сия же образи нам быша, яко не быти нам похотником злых, якоже и они похотеша.
7 Ни идолослужителе бывайте, якоже нецыи от них, якоже есть писано: седоша людие ясти и пити, и восташа играти.
8 Ниже соблудим, якоже нецыи от них соблудиша, и падоша во един день двадесять три тысящы.
9 Ни да искушаим Христа, якоже нецыи от них искусиша и от змий погибоша.
10 Ни ропщите, якоже нецыи от них ропташа и погибоша от всегубителя.
11 Сия же вся образи прилучахуся онем: писана же быша в научение наше, в нихже концы век достигоша.
12 Темже мняйся стояти да блюдется, да не падет.
13 Искушение вас не достиже, точию человеческое: верен же Бог, Иже не оставит вас искуситися паче, еже можете, но сотворит со искушением и избытие, яко возмощи вам понести.
14 Темже, братие моя возлюбленная, бегайте от идолослужения.
15 Яко мудрым глаголю: судите вы, еже глаголю:
16 чаша благословения, юже благословляем, не общение ли Крове Христовы есть? Хлеб, егоже ломим, не общение ли Тела Христова есть?
17 Яко един хлеб, едино тело есмы мнози: вси бо от единаго хлеба причащаемся.
18 Видите Израиля по плоти: не ядущии ли жертвы общницы олтареви суть?
19 Что убо глаголю? Яко идол что есть? Или идоложертвенное что есть?
20 Но зане, яже жрут языцы, бесом жрут, а не Богови: не хощу же вас общников быти бесом.
21 Не можете чашу Господню пити и чашу бесовскую: не можете трапезе Господней причащатися и трапезе бесовстей.
22 Или раздражаем Господа? Еда крепчайши Его есмы?
23 Вся ми леть суть, но не вся на пользу: вся ми леть суть, но не вся назидают.
24 Никтоже своего си да ищет, но еже ближняго кийждо.
25 Все, еже на торжищи продаемое, ядите, ничтоже сумнящеся, за совесть:
26 Господня бо земля и исполнение ея.
27 Аще ли кто от неверных призывает вы, и хощете ити, все предлагаемое вам ядите, ничтоже сумнящеся, за совесть.
28 Аще ли же кто вам речет: сие идоложертвенно есть: не ядите за оного поведавшаго, и совесть: Господня бо земля и исполнение ея.
29 Совесть же глаголю не свою, но другаго: вскую бо свобода моя судится от иныя совести?
30 Аще аз благодатию причащаюся, почто хулу приемлю, о немже аз благодарю?
31 Аще убо ясте, аще ли пиете, аще ли ино что творите, вся во славу Божию творите.
32 Безпреткновени бывайте Иудеем и Еллином и церкви Божией,
33 якоже и аз во всем всем угождаю, не иский своея пользы, но многих, да спасутся. 11
1 Подражателе мне бывайте, якоже и аз Христу.
2 Хвалю же вы, братие, яко вся моя помните, и якоже предах вам, предания держите.
3 Хощу же вас ведети, яко всякому мужу глава Христос есть, глава же жене муж, глава же Христу Бог.
4 Всяк муж, молитву дея или пророчествуяй покрытою главою, срамляет главу свою:
5 и всяка жена, молитву деющая или пророчествующая откровенною главою, срамляет главу свою: едино бо есть и тожде остриженней:
6 аще бо не покрывается жена, да стрижется: аще ли же срам жене стрищися или бритися, да покрывается.
7 Муж убо не должен есть покрывати главу, образ и слава Божия сый: жена же слава мужу есть.
8 Несть бо муж от жены, но жена от мужа:
9 ибо не создан бысть муж жены ради, но жена мужа ради.
10 Сего ради должна есть жена власть имети на главе Ангел ради.
11 Обаче ни муж без жены, ни жена без мужа, о Господе.
12 Якоже бо жена от мужа, сице и муж женою: вся же от Бога.
13 В вас самех судите, лепо ли есть жене откровенней Богу молитися?
14 Или и не самое естество учит вы, яко муж убо аще власы растит, безчестие ему есть,
15 жена же аще власы растит, слава ей есть? Зане растение власов вместо одеяния дано бысть ей.
16 Аще ли кто мнится спорлив быти, мы таковаго обычая не имамы, ниже церкви Божия.
17 Сие же завещавая не хвалю, яко не на лучшее, но на хуждшее сбираетеся.
18 Первое убо, сходящымся вам в церковь, слышу в вас распри сущыя, и часть некую (сих) верую.
19 Подобает бо и ересем в вас быти, да искуснии явлени бывают в вас.
20 Сходящымся убо вам вкупе, несть Господскую вечерю ясти:
21 кийждо бо свою вечерю предваряет в снедение, и ов убо алчет, ов же упивается.
22 Еда бо домов не имате, во еже ясти и пити? Или о церкви Божией нерадите и срамляете не имущыя? Что вам реку? Похвалю ли вы о сем? Не похвалю.
23 Аз бо приях от Господа, еже и предах вам, яко Господь Иисус в нощь, в нюже предан бываше, приемь хлеб,
24 и благодарив преломи, и рече: приимите, ядите, сие есть Тело Мое, еже за вы ломимое: сие творите в Мое воспоминание.
25 Такожде и чашу по вечери, глаголя: сия чаша новый завет есть в Моей Крови: сие творите, елижды аще пиете, в Мое воспоминание.
26 Елижды бо аще ясте хлеб сей и чашу сию пиете, смерть Господню возвещаете, дондеже приидет.
27 Темже иже аще яст хлеб сей или пиет чашу Господню недостойне, повинен будет Телу и Крови Господни.
28 Да искушает же человек себе, и тако от хлеба да яст и от чаши да пиет.
29 Ядый бо и пияй недостойне, суд себе яст и пиет, не разсуждая Тела Господня.
30 Сего ради в вас мнози немощни и недужливи, и спят доволни.
31 Аще бо быхом себе разсуждали, не быхом осуждени были.
32 Судими же, от Господа наказуемся, да не с миром осудимся.
33 Темже, братие моя, сходящеся ясти, друг друга ждите.
34 Аще ли кто алчет, в дому да яст, да не в грех сходитеся. О прочих же, егда прииду, устрою. 12
1 О духовных же, братие, не хощу вас не ведети.
2 Весте, яко егда неверни бесте, ко идолом безгласным яко ведоми ведостеся.
3 Темже сказую вам, яко никтоже, Духом Божиим глаголяй, речет анафема Иисуса, и никтоже может рещи Господа Иисуса, точию Духом Святым.
4 Разделения же дарований суть, а тойжде Дух:
5 и разделения служений суть, а тойжде Господь:
6 и разделения действ суть, а тойжде есть Бог, действуяй вся во всех.
7 Комуждо же дается явление Духа на пользу:
8 овому бо Духом дается слово премудрости, иному же слово разума, о томже Дусе:
9 другому же вера, темже Духом: иному же дарования исцелений, о томже Дусе:
10 другому же действия сил, иному же пророчество, другому же разсуждения духовом, иному же роди языков, другому же сказания языков.
11 Вся же сия действует един и тойжде Дух, разделяя властию коемуждо якоже хощет.
12 Акоже бо тело едино есть и уды имать многи, вси же уди единаго тела, мнози суще, едино суть тело: тако и Христос.
13 Ибо единем Духом мы вси во едино тело крестихомся, аще Иудее, аще Еллини, или раби, или свободни: и вси единем Духом напоихомся.
14 Ибо тело несть един уд, но мнози.
15 Аще речет нога, яко несмь рука, несмь от тела: еда сего ради несть от тела?
16 И аще речет ухо, яко несмь око, несмь от тела: еда сего ради несть от тела?
17 Аще все тело око, где слух? Аще (же) все слух, где ухание?
18 Ныне же положи Бог уды, единаго коегождо их в телеси, якоже изволи.
19 Аще ли быша вси един уд, где тело?
20 Ныне же мнози убо удове, едино же тело.
21 Не может же око рещи руце: не требе ми еси: или паки глава ногама: не требе ми есте.
22 Но много паче, мнящиися уди тела немощнейши быти, нужнейши суть,
23 и ихже мним безчестнейших быти тела, сим честь множайшую прилагаем:
24 и неблагообразнии наши благообразие множайше имут, а благообразнии наши не требе имут. Но Бог раствори тело, худейшему болшу дав честь,
25 да не будет распри в телеси, но да тожде в себе пекутся уди.
26 И аще страждет един уд, с ним страждут вси уди: аще ли же славится един уд, с ним радуются вси уди.
27 Вы же есте тело Христово, и уди от части.
28 И овых убо положи Бог в Церкви первее Апостолов, второе пророков, третие учителей: потом же силы, таже дарования исцелений, заступления, правления, роди языков.
29 Еда вси Апостоли? Еда вси пророцы? Еда вси учителе? Еда вси силы?
30 Еда вси дарования имут изцелений? Еда вси языки глаголют? Еда вси сказуют?
31 Ревнуйте же дарований болших, и еще по превосхождению путь вам показую. 13
1 Аще языки человеческими глаголю и ангелскими, любве же не имам, бых (яко) медь звенящи, или кимвал звяцаяй.
2 И аще имам пророчество, и вем тайны вся и весь разум, и аще имам всю веру, яко и горы преставляти, любве же не имам, ничтоже есмь.
3 И аще раздам вся имения моя, и аще предам тело мое, во еже сжещи е, любве же не имам, ни кая польза ми есть.
4 Любы долготерпит, милосердствует, любы не завидит, любы не превозносится, не гордится,
5 не безчинствует, не ищет своих си, не раздражается, не мыслит зла,
6 не радуется о неправде, радуется же о истине:
7 вся любит, всему веру емлет, вся уповает, вся терпит.
8 Любы николиже отпадает, аще же пророчествия упразднятся, аще ли языцы умолкнут, аще разум испразднится.
9 От части бо разумеваем и от части пророчествуем:
10 егда же приидет совершенное, тогда, еже от части, упразднится.
11 Егда бех младенец, яко младенец глаголах, яко младенец мудрствовах, яко младенец смышлях: егда же бых муж, отвергох младенческая.
12 Видим убо ныне якоже зерцалом в гадании, тогда же лицем к лицу: ныне разумею от части, тогда же познаю, якоже и познан бых.
13 Ныне же пребывают вера, надежда, любы, три сия: болши же сих любы. 14
1 Держитеся любве: ревнуйте же духовным, паче же да пророчествуете.
2 Глаголяй бо языки, не человеком глаголет, но Богу: никтоже бо слышит, духом же глаголет тайны:
3 пророчествуяй же, человеком глаголет созидание и утешение и утверждение.
4 Глаголяй (бо) языки себе зиждет, а пророчествуяй церковь зиждет.
5 Хощу же всех вас глаголати языки, паче же да прорицаете: болий бо пророчествуяй, нежели глаголяй языки, разве аще (кто) сказует, да церковь созидание приемлет.
6 Ныне же, братие, аще прииду к вам языки глаголя, кую вам пользу сотворю, аще вам не глаголю или во откровении, или в разуме, или в пророчествии, или в научении?
7 Обаче бездушная глас дающая, аще сопель, аще гусли, аще разнствия писканием не дадят, како разумно будет пискание или гудение?
8 Ибо аще безвестен глас труба даст, кто уготовится на брань?
9 Тако и вы аще не благоразумно слово дадите языком, како уразумеется глаголемое? Будете бо на воздух глаголюще.
10 Толицы убо, аще ключится, роди гласов суть в мире, и ни един их безгласен.
11 Аще убо не увем силы гласа, буду глаголющему иноязычник, и глаголющий мне иноязычник.
12 Тако и вы, понеже ревнителе есте духовом, (яже) к созиданию церкве просите, да избыточествуете.
13 Темже глаголяй языком да молится, да сказует.
14 Аще бо молюся языком, дух мой молится, а ум мой без плода есть.
15 Что убо есть? Помолюся духом, помолюся же и умом: воспою духом, воспою же и умом.
16 Понеже аще благословиши духом, исполняяй место невежды како речет аминь, по твоему благодарению? Понеже не весть, что глаголеши.
17 Ты убо добре благодариши, но другий не созидается.
18 Благодарю Бога моего, паче всех вас языки глаголя:
19 но в церкви хощу пять словес умом моим глаголати, да и ины пользую, нежели тмы словес языком.
20 Братие, не дети бывайте умы: но злобою младенствуйте, умы же совершени бывайте.
21 В законе пишет: яко иными языки и устны иными возглаголю людем сим, и ни тако послушают Мене, глаголет Господь.
22 Темже языцы в знамение суть не верующым, но неверным: а пророчество не неверным, но верующым.
23 Аще убо снидется церковь вся вкупе, и вси языки глаголют, внидут же (и) неразумивии или невернии, не рекут ли, яко беснуетеся?
24 Аще же вси пророчествуют, внидет же некий неверен или невежда, обличается всеми, (и) истязуется от всех,
25 и сице тайная сердца его явлена бывают: и тако пад ниц поклонится Богови, возвещая, яко воистинну Бог с вами есть.
26 Что убо есть, братие? Егда сходитеся, кийждо вас псалом имать, учение имать, язык имать откровение имать, сказание имать: вся (же) к созиданию да бывают.
27 Аще языком кто глаголет, по двема, или множае по трием, и по части: и един да сказует.
28 Аще ли не будет сказатель, да молчит в церкви, себе же да глаголет и Богови.
29 Пророцы же два или трие да глаголют, и друзии да разсуждают:
30 аще ли иному открыется седящу, первый да молчит.
31 Можете бо вси по единому пророчествовати, да вси учатся и вси утешаются.
32 И дуси пророчестии пророком повинуются:
33 несть бо нестроения Бог, но мира, яко во всех церквах святых.
34 Жены вашя в церквах да молчат: не повелеся бо им глаголати, но повиноватися, якоже и закон глаголет.
35 Аще ли чесому научитися хотят, в дому своих мужей да вопрошают: срамно бо есть жене в церкви глаголати.
36 Или от вас слово Божие изыде? Или вас единых достиже?
37 Аще кто мнится пророк быти или духовен, да разумеет, яже пишу вам, зане Господни суть заповеди?
38 Аще ли кто не разумеет, да не разумевает.
39 Темже, братие моя, ревнуйте еже пророчествовати, и еже глаголати языки не возбраняйте:
40 вся же благообразно и по чину да бывают. 15
1 Сказую же вам, братие, Благовествование, еже благовестих вам, еже и приясте, в немже и стоите,
2 имже и спасаетеся, кацем словом благовестих вам, аще содержите: разве аще не всуе веровасте.
3 Предах бо вам исперва, еже и приях, яко Христос умре грех наших ради, по Писанием,
4 и яко погребен бысть, и яко воста в третий день, по Писанием,
5 и яко явися Кифе, таже единонадесятим:
6 потом же явися боле пяти сот братиям единою, от нихже множайшии пребывают доселе, нецыи же и почиша:
7 потом же явися Иакову, таже Апостолом всем:
8 последи же всех, яко некоему извергу, явися и мне.
9 Аз бо есмь мний Апостолов, иже несмь достоин нарещися Апостол, зане гоних церковь Божию.
10 Благодатию же Божиею есмь, еже есмь, и благодать Его, яже во мне, не тща бысть, но паче всех их потрудихся: не аз же, но благодать Божия, яже со мною.
11 Аще убо аз, аще ли они, тако проповедуем, и тако веровасте.
12 Аще же Христос проповедуется, яко из мертвых воста, како глаголют нецыи в вас, яко воскресения мертвых несть?
13 И аще воскресения мертвых несть, то ни Христос воста:
14 аще же Христос не воста, тще убо проповедание наше, тща же и вера ваша.
15 Обретаемся же и лжесвидетеле Божии, яко послушествовахом на Бога, яко воскреси Христа, Егоже не воскреси, аще убо мертвии не востают:
16 аще бо мертвии не востают, то ни Христос воста:
17 аще же Христос не воста, суетна вера ваша, еще есте во гресех ваших:
18 убо и умершии о Христе, погибоша.
19 (И) аще в животе сем точию уповающе есмы во Христа, окаяннейши всех человек есмы.
20 Ныне же Христос воста от мертвых, начаток умершым бысть.
21 Понеже бо человеком смерть (бысть), и человеком воскресение мертвых.
22 Якоже бо о Адаме вси умирают, такожде и о Христе вси оживут,
23 кийждо же во своем чину: начаток Христос, потом же Христу веровавшии в пришествии Его.
24 Таже кончина, егда предаст Царство Богу и Отцу, егда испразднит всяко началство и всяку власть и силу:
25 подобает бо Ему царствовати, дондеже положит вся враги под ногама Своима.
26 Последний же враг испразднится смерть,
27 вся бо покори под нозе Его: внегда же рещи, яко вся покорена суть Ему, яве, яко разве Покоршаго Ему вся.
28 Егда же покорит Ему всяческая, тогда и Сам Сын покорится Покоршему Ему всяческая, да будет Бог всяческая во всех.
29 Понеже что сотворят крестящиися мертвых ради? Аще отнюд мертвии не востают, что и крещаются мертвых ради?
30 Почто (же) и мы беды приемлем на всяк час?
31 По вся дни умираю: тако ми ваша похвала, братие, юже имам о Христе Иисусе Господе нашем.
32 Аще (бо) по человеку со зверем боряхся в Ефесе, кая ми польза, аще мертвии не востают? Да ямы и пием, утре бо умрем.
33 Не льститеся: тлят обычаи благи беседы злы.
34 Истрезвитеся праведно и не согрешайте: неведение бо Божие нецыи имут, к сраму вам глаголю.
35 Но речет некто: како востанут мертвии? Коим же телом приидут?
36 Безумне, ты еже сееши, не оживет, аще не умрет:
37 и еже сееши, не тело будущее сееши, но голо зерно, аще случится, пшеницы или иного от прочих:
38 Бог же дает ему тело, якоже восхощет, и коемуждо семени свое тело.
39 Не всяка плоть таже плоть: но ина убо плоть человеком, ина же плоть скотом, ина же рыбам, ина же птицам.
40 И телеса небесная, и телеса земная: но ина убо небесным слава, и ина земным:
41 ина слава солнцу, и ина слава луне, и ина слава звездам: звезда бо от звезды разнствует во славе.
42 Такожде и воскресение мертвых: сеется в тление, востает в нетлении:
43 сеется не в честь, востает в славе: сеется в немощи, востает в силе:
44 сеется тело душевное, востает тело духовное. Есть тело душевное, и есть тело духовное.
45 Тако и писано есть: бысть первый человек Адам в душу живу, последний Адам в дух животворящь.
46 Но не прежде духовное, но душевное, потом же духовное.
47 Первый человек от земли, перстен: вторый человек Господь с небесе.
48 Яков перстный, такови и перстнии: и яков небесный, тацы же и небеснии:
49 и якоже облекохомся во образ перстнаго, да облечемся и во образ небеснаго.
50 Сие же глаголю, братие, яко плоть и кровь Царствия Божия наследити не могут, ниже тление нетления наследствует.
51 Се, тайну вам глаголю: вси бо не успнем, вси же изменимся
52 вскоре, во мгновении ока, в последней трубе: вострубит бо, и мертвии востанут нетленни, и мы изменимся:
53 подобает бо тленному сему облещися в нетление и мертвенному сему облещися в безсмертие.
54 Егда же тленное сие облечется в нетление и смертное сие облечется в безсмертие, тогда будет слово написанное: пожерта бысть смерть победою.
55 Где ти, смерте, жало? Где ти, аде, победа?
56 Жало же смерти грех: сила же греха закон.
57 Богу же благодарение, давшему нам победу Господем нашим Иисус Христом.
58 Темже, братие моя возлюбленная, тверди бывайте, непоступни, избыточествующе в деле Господни всегда, ведяще, яко труд ваш несть тощь пред Господем. 16
1 О милостыни же, яже ко святым, якоже устроих церквам Галатийским, тако и вы сотворяйте:
2 по единей от суббот кийждо вас да полагает у себе сохраняя, еже аще что благопоспешится, да не егда прииду, тогда собрания бывают.
3 Егда же прииду, ихже аще искусите, с посланьми сих послю отнести благодать вашу во Иерусалим.
4 Аще же достойно будет и мне ити, со мною пойдут.
5 Прииду же к вам, егда Македонию преиду: Македонию бо прохожду.
6 У вас же, аще случится мне, пребуду, или и озимею, да вы мя проводите, аможе аще поиду.
7 Не хощу бо вас ныне в мимохождении видети: уповаю же время некое пребыти у вас, аще Господь повелит.
8 Пребуду же во Ефесе до Пентикостии:
9 дверь бо ми отверзеся велика и поспешна, и сопротивнии мнози.
10 Аще же приидет Тимофей, блюдите, да без страха будет у вас: дело бо Господне делает, якоже и аз:
11 да никтоже убо его уничижит: проводите же его с миром, да приидет ко мне, жду бо его с братиею.
12 О Аполлосе же брате: много молих его, да приидет к вам с братиею: и всяко не бе воля, да ныне приидет, приидет же, егда упразднится.
13 Бодрствуйте, стойте в вере, мужайтеся, утверждайтеся:
14 вся вам любовию да бывают.
15 Молю же вы, братие: весте дом Стефанинов, яко есть начаток Ахаии, и в служение святым учиниша себе:
16 да и вы повинуйтеся таковым и всякому споспешствующу и труждающуся.
17 Возрадовахся же о пришествии Стефанинове и Фуртунатове и Ахаикове, яко ваше лишение сии исполниша:
18 упокоиша бо мой дух и ваш. Познавайте убо таковыя.
19 Целуют вы церкви Асийския: целуют вы о Господе много Акила и Прискилла с домашнею их церковию.
20 Целуют вы братия вся. Целуйте друг друга лобзанием святым.
21 Целование моею рукою Павлею.
22 Аще кто не любит Господа Иисуса Христа, да будет проклят, маран афа.
23 Благодать Господа нашего Иисуса Христа с вами,
24 (и) любы моя со всеми вами о Христе Иисусе. Аминь.
