15.05.2011Видео о Православии.

10.05.2011 Весна.

11.05.2011 Церковь села Попово-Лежачи.

Книга Пророка Варуха.

Книга Пророка Варуха. Славянский текст.1

1 Сия словеса книги, юже написа Варух сын Нириин, сына Маасеева, сына Седекиина, сына Асадеева, сына Хелкиина в Вавилоне, 
2 в пятое лето, в седмый день месяца, во время, в неже взяша Халдее Иерусалим и пожгоша его огнем. 
3 И прочте Варух словеса книги сея во ушы Иехонии сына Иоакима царя Иудина и во ушы всех людий приходящих ко книзе, 
4 и во ушы сильных и сынов царских и во ушы старейшин, и во ушы всех людий от мала и до велика их, всех живущих в Вавилоне при реце Суд. 
5 И плакахуся, и постяхуся, и моляхуся молитвами пред Господем, 
6 и собраша сребро, якоже когождо можаше рука, 
7 и послаша во Иерусалим ко Иоакиму жерцу великому, сыну Хелкиину сына Саломля и ко жерцем и ко всем людем, иже обретошася с ним во Иерусалиме, 
8 внегда взя сосуды храма Господня изнесеныя от храма возвратити на землю Иудину, в десятый день месяца Сиван, сосуды сребряны, яже сотвори Седекиа сын Иосиин царь Иудин, 
9 повнегда пресели Навуходоносор царь Вавилонский Иехонию и князи, и узники и сильныя и люди земли от Иерусалима, и введе я (связаны) в Вавилон. 
10 И рекоша: се, послахом к вам сребро, да купите на сребре всесожжения за грех и фимиам, и сотворите жертву и вознесите на жертвенник Господа Бога нашего, 
11 и молитеся за житие Навуходоносора царя Вавилонскаго и за житие Валтасара сына его, да будут дние их, якоже дние небеснии, на земли. 
12 И да даст Господь крепость нам и да просветит очи наши, и да живем под сению Навуходоносора царя Вавилонска и под сению Валтасара сына его, да работаем им дни многи и обрящем благодать пред ними. 
13 И молитеся за нас ко Господеви Богу нашему, яко согрешихом Господеви Богу нашему, и не отвратися ярость Господня и гнев Его от нас до сего дне. 
14 И прочтите книгу сию, юже послахом к вам, исповедати в дому Господни в день праздника, во дни годовыя, 
15 и да речете: Господу Богу нашему правда, а нам стыдение лиц, якоже день сей, человеку Иудину и живущым во Иерусалиме, 
16 и царем нашым и князем нашым, и жерцем нашым и пророком нашым и отцем нашым: 
17 понеже согрешихом пред Господем 
18 и не покорихомся Ему и не послушахом гласа Господа Бога нашего ходити в повелениих Его, яже даде пред лицем нашим. 
19 От дне, в оньже изведе Господь отцы нашя от земли Египетски, и до сего дне бехом не покаряющеся Господеви Богу нашему и отметахомся, еже не послушати гласа Его. 
20 И прильпе к нам зло и клятва, юже сочини Господь Моисею отроку Своему в день, в оньже изведе Господь отцы нашя от земли Египетския, дати нам землю кипящую млеком и медом, якоже день сей. 
21 И не послушахом гласа Господа Бога нашего по всем словесем пророческим, яже посла к нам, 
22 и хождахом кийждо нас по разуму сердца своего злаго работати богом инем, творити злая пред очима Господа Бога нашего. 

2

1 И устави Господь слово Свое, еже глагола на нас и на судий наших, судивших во Израили, и на цари нашя и на князи нашя, и на всякаго человека Израилева и Иудина, 
2 навести на ны зло велие, еже не сотворися под всем небесем, якоже сотворися во Иерусалиме, по писанным в законе Моисеове, 
3 еже ясти нам плоть человеческу сына своего и плоть человеческу дщере своея. 
4 И даде я подручны всем царствам, яже окрест нас, на укоризну и в непрохождение во всех людех, иже окрест нас, аможе их разсея Господь. 
5 И быхом во исподи, а не в верху, яко согрешихом Господеви Богу нашему, не слушающе гласа Его. 
6 Господеви Богу нашему правда, нам же и отцем нашым стыдение лиц, якоже день сей. 
7 Иже глагола Господь на нас вся злая, сия приидоша на ны, 
8 зане не молихомся лицу Господню, еже отвратитися комуждо от мыслей сердца своего злаго. 
9 И убудися Господь о злобах и наведе на нас сия, (яже постигоша ны,) яко праведен Господь во всех делех Своих, яже заповеда нам. 
10 И не послушахом гласа Его ходити в повелениих Его, яже даде пред лицем нашим. 
11 И ныне, Господи Боже Израилев, иже извел еси люди Твоя из земли Египетския рукою крепкою и мышцею высокою, знамении и чудесы и силою великою, и сотворил еси Себе имя, якоже день сей, 
12 согрешихом, нечествовахом, неправдовахом, Господи Боже наш, во всех оправданиих Твоих. 
13 Да отвратится убо от нас ярость Твоя, яко остася нас мало во языцех, аможе разсеял ны еси. 
14 Услыши, Господи, молитву нашу и прошение наше, и избави нас Тебе ради, и даждь нам благодать пред лицем преселивших нас: 
15 да увесть вся земля, яко Ты Господь Бог наш, и яко имя Твое призвася на Израили и на племени его. 
16 Господи, призри из дому святаго Твоего на нас и вонми нам, и приклони ухо Твое и услыши нас. 
17 Отверзи, Господи, очи Твои и виждь, яко не умершии, иже во аде, ихже взяся дух их от утроб их, воздадят Тебе славу и оправдание Господеви: 
18 но душа сетующая о величестве зла, иже ходит слячен и боляй, и очи оскудевающии, и душа алчущая воздадят Тебе славу и правду, Господи! 
19 Яко не по оправданием отец наших, ни царей наших (изливаем молитвы) мы, и предлагаем молитвы нашя пред лицем Твоим, Господи Боже наш! 
20 Яко послал еси ярость Твою и гнев Твой на нас, якоже глаголал еси рукою отрок Твоих пророк, глаголя: 
21 тако рече Господь: приклоните рамена ваша и послужите царю Вавилонскому, и седите на земли, юже дах отцем вашым: 
22 и аще не послушаете гласа Господня, еже работати царю Вавилонску, оскудение сотворю из градов Иудиных и внеуду Иерусалима, 
23 и отиму (от вас) глас веселия и глас радования, глас жениха и глас невесты, и будет вся земля в непрохождение от живущих. 
24 И не послушахом гласа Твоего служити царю Вавилонску: и уставил еси словеса Твоя, яже глаголал еси рукою отрок Твоих пророков, еже изнести кости царей наших и кости отец наших от места их. 
25 И се, суть извержены зною дневному и студени нощней, и изомроша болезньми злыми, гладом и мечем и затчением. 
26 И положил еси дом Твой, в немже наречеся имя Твое, якоже день сей, злобы ради дому Израилева и дому Иудина.
27 И сотворил еси в нас, Господи Боже наш, по всей тихости Твоей и по всем щедротам Твоим великим, 
28 якоже глаголал еси рукою раба Твоего Моисеа в день, в оньже заповедал еси ему вписати закон Твой пред сыны Израилевыми, глаголя: 
29 аще не послушаете гласа Моего, множество сие великое и многое обратится в мал язык во языцех, аможе Аз разсею я: 
30 разумех бо, яко не имут послушати Мене, яко людие жестоковыйни суть, и обратятся к сердцу своему на земли преселения своего, 
31 и уведят, яко Аз Господь Бог их: и дам им сердце, (и уразумеют,) и ушы, и услышат, 
32 и похвалят Мя на земли преселения своего, и помянут имя Мое, 
33 и обратятся от хребта своего жестокаго и от злоб своих, яко помянут путь отец своих согрешивших пред Господем: 
34 и возвращу я на землю, еюже кляхся отцем их, Аврааму и Исааку и Иакову, и возобладают ею: и умножу я, и не умалятся: 
35 и уставлю им завет вечен, еже быти Мне им в Бога, и тии будут Мне людие: и не подвигну ктому людий Моих Израиля и земли, юже дах им. 

3

1 Господи Вседержителю, Боже Израилев, душа в тесноте и дух в стужении возопи к Тебе: 
2 услыши, Господи, и помилуй, яко еси Бог милосерд, и помилуй нас, яко согрешихом пред Тобою: 
3 яко Ты пребываяй во век, мы же погибающии во век. 
4 Господи Вседержителю, Боже Израилев, услыши молитву умерших Израилевых и сынов согрешивших пред Тобою, иже не послушаша гласа Господа Бога своего, и прильпоша нам злая. 
5 Не помяни неправд отец наших, но помяни руку Твою и имя Твое в сие время, 
6 яко Ты Господь Бог наш, и похвалим Тя, Господи: 
7 яко того ради дал еси страх Твой в сердце наше, еже призывати имя Твое, и похвалим Тя во преселении нашем, яко отвратихом от сердца нашего всю неправду отец наших согрешивших пред Тобою. 
8 Се, мы днесь во преселении нашем, аможе ны разсыпал еси на укоризну и на клятву и на удержание, по всем неправдам отец наших, иже отступиша от Тебе, Господи Боже наш. 
9 Слыши, Израилю, заповеди живота, внуши разумети смышление. 
10 Что есть, Израилю? Что яко еси на земли вражии? Обетшал еси на земли чуждей, осквернился еси с мертвыми, 
11 вменился еси с сущими во аде, 
12 оставил еси источника премудрости. 
13 Аще бы путем Божиим ходил еси, жил бы в мире во время вечное. 
14 Научися, где есть смышление, где есть крепость, где есть мудрость? Еже разумети купно, где есть долгожитие и жизнь, где есть свет очес и мир? 
15 Кто обрете место ея, и кто вниде в сокровища ея? 
16 Где суть князи язычестии и владеющии зверьми сущими на земли, играющии птицами небесными 
17 и хранящии злато и сребро, на неже уповаша человецы, и несть конца стяжанию их? 
18 Яко делающии сребро и пекущиися, и несть изобретения дел их. 
19 Погибоша и во ад снидоша, и инии вместо их восташа. 
20 Юнейшии видеша свет и вселишася на земли, пути же хитрости не уведеша, 
21 ни разумеша стезь ея, ниже прияша ея сынове их, от пути своего далече быша. 
22 И не слышася в Ханаане, ниже явися во Фемане: 
23 сынове Агарини взыскующии разума, иже на земли, купцы Мерани и Фемани, и баснословцы и взыскателие разума, пути премудрости не уведеша, ниже помянуша стезь ея. 
24 О, Израилю, коль велик дом Божий и пространно место селения его! 
25 Велико и не имать конца, высоко и безмерно. 
26 Тамо быша исполини именитии, бывшии исперва зело велицы, умеюще воевати. 
27 Не сих избра Бог, ни пути хитростнаго даде им, 
28 и погибоша, занеже не имеша мудрости, погибоша за безсоветие свое. 
29 Кто взыде на небо, и взя ю, и снесе ю от облак? 
30 Кто прейде на ону страну моря, и обрете ю, и возмет ю за злато избранно? 
31 Несть ведущаго путь ея, ни помышляющаго стезь ея: 
32 но Ведый вся весть ю, изобрете ю смыслом Своим: Сотворивый землю в вечное время наполни ю скотом двоножным и четвероножным. 
33 Посылаяй свет, и идет: призва его, и послуша Его со трепетом. 
34 Звезды же возсияша во хранилищих своих и возвеселишася. 
35 Призва я, и рекоша: приидохом: возсияша с веселием Сотворшему я. 
36 Сей Бог наш, не вменится ин к Нему. 
37 Изобрете всяк путь хитрости и даде ю Иакову отроку Своему и Израилю возлюбленному от Него. 
38 Посем на земли явися и с человеки поживе. 

4

1 Сия книга повелений Божиих и закон сый во век: вси держащиися ея в живот (внидут), оставившии же ю умрут. 
2 Обратися, Иакове, и имися ея, ходи ко сиянию прямо света ея. 
3 Не даждь иному славы твоея, и полезных тебе языку чуждему. 
4 Блажени есмы, Израилю, яко угодная Богу нам разумна суть. 
5 Дерзайте, людие мои, память Израилева. 
6 Продани бысте языком не на пагубу: понеже разгневасте Бога, предани бысте супостатом, 
7 преогорчисте бо Сотворшаго вас, (Бога вечнаго,) пожерше бесом, а не Богу: 
8 забысте бо Господа питающаго вас, опечалисте же и воспитавшаго вас Иерусалима. 
9 Виде бо нашедший вам гнев от Бога и рече: слышите, приселницы Сиони, наведе бо ми Господь сетование велико, 
10 видех бо пленение людий сынов моих и дщерей, еже наведе им Вечный. 
11 Питах бо я с веселием, испустих же я с плачем и рыданием. 
12 Никтоже да радуется о мне вдовице и оставленней от многих, опустех за грехи чад моих, понеже уклонишася от закона Божия, 
13 и оправданий Его не познаша, и не ходиша в путех заповедий Божиих, ниже стезьми наказания в правде Его ступаша. 
14 Да приидут окрестнии Сиони, и помяните пленение сынов моих и дщерей, еже наведе им Вечный: 
15 наведе бо на ня язык издалеча, язык безстудный и иноязычный: 
16 понеже не усрамишася старца, ни помиловаша отрочате, и отведоша любезных вдовичих, и от дщерей едину опустошиша. 
17 Аз же како мощен помощи вам? 
18 Наведый бо вам злая избавит вас от руки враг ваших. 
19 Идите, чада, идите: аз бо остахся пуста, 
20 совлекохся ризы мирныя, облекохся же во вретище моления моего: возопию к Вечному во дни моя. 
21 Дерзайте, чада, возопийте к Богу, и избавит вас от насилия руки вражия. 
22 Аз бо (исперва) надеяхся на Вечнаго о спасении вашем: и прииде ми радость от Святаго в помиловании, еже приидет вам вскоре от Вечнаго Спаса нашего. 
23 Испустих бо вас с рыданием и плачем, отдаст же ми Бог вас с радостию и веселием в век. 
24 Якоже бо ныне видеша приселницы Сиони ваше пленение (от Бога), такожде узрят вскоре спасение ваше от Бога, еже приидет вам со славою великою и со освещением Вечнаго. 
25 Чада, долготерпите иже от Бога нашедший вам гнев, гонил бо тя враг твой, и узриши пагубу его вскоре и на выю его наступиши. 
26 Младии мои ходиша в пути жестоки, восхищени суть, якоже стадо похищено врагами. 
27 Дерзайте, чада, и возопийте к Богу, будет бо вам от Наведшаго память. 
28 Якоже бо бысть ум ваш заблудити вам от Бога, тако ныне десятижды усугубите обратившеся взыскати Его: 
29 Наведый бо вам злая наведет вам вечное веселие со спасением вашим. 
30 Дерзай, Иерусалиме, утешит тя нарекий тебе. 
31 Окаянни озлобившии тя и радовавшиися о падении твоем, (мщение будет над ними). 
32 Окаянни гради, имже поработаша чада твоя, окаянна приимшая сыны твоя. 
33 Якоже бо порадовася о твоем падении и возвеселися о разорении твоем, такожде опечалится о своем запустении. 
34 И отсеку от нея веселие многонародства, и величание ея будет в рыдание. 
35 Огнь и найдет на ню от Вечнаго во дни многи, и населится бесами на множайшее время. 
36 Воззри на восток, Иерусалиме, и виждь веселие грядущее тебе от Бога. 
37 Се, грядут сынове твои, ихже испустил еси, грядут собрани от восток даже до запад словом Святаго, радующеся о славе Божией. 

5

1 Совлецы, Иерусалиме, ризы плачевныя и озлобления твоего и облецыся в лепоту славы, яже тебе бысть от Бога во век. 
2 Облецыся во одежду правды, яже от Бога, возложи венец на главу твою славы Вечнаго. 
3 Бог бо явит всей поднебесней твою светлость. 
4 Наречется бо от Бога имя твое во веки: мир правды и слава богочестия. 
5 Востани, Иерусалиме, и стани на высоце, и поглядай на востоки, и виждь собраная чада твоя от восток солнца до запада словом Святаго, радующаяся Божиею памятию. 
6 Изыдоша бо от тебе пеши ведоми от врагов, введет же я Бог к тебе несомых со славою, яко сыны царства. 
7 Совеща бо Бог смиритися всяцей горе высоцей и холмом вечным, и юдолиям наполнитися в равень земную, да идет Израиль утвержен славою Божиею. 
8 Осениша же и дубравы и всяко древо благовонством Израилю, повелением Божиим. 
9 Предидет бо Бог Израилеви со веселием, светом славы Своея, с помилованием и правдою, яже от Него. 

Книга плач Иеремии.

Книга плач Иеремии. Славянский текст. 1

И бысть, повнегда в плен отведен бе Израиль, и Иерусалим опустошен бяше, сяде Иеремиа пророк плачущь, и рыдаше рыданием сим над Иерусалимом и глаголаше:
1 Алеф. Како седе един град умноженный людьми: бысть яко вдовица, умноженный во языцех, владяй странами бысть под данию. 
2 Беф. Плачя плакася в нощи, и слезы его на ланитех его, и несть утешаяй его от всех любящих его: вси дружащиися с ним отвергошася его, быша ему врази. 
3 Гимель. Преселися Иуда ради смирения своего и ради множества работы своея: седе во языцех, не обрете покоя. Вси гонящии его постигнуша и среде стужающих ему. 
4 Далеф. Путие Сиони рыдают, яко несть ходящих по них в праздник, вся врата его разорена, жерцы его воздыхают, девицы его ведомы, и сам огорчеваемь в себе. 
5 Ге. Быша стужающии ему во главу, и врази его угобзишася, яко Господь смири его за множество нечестия его: младенцы его отидоша пленени пред лицем стужающаго. 
6 Вав. И отяся от дщере Сиони вся лепота ея: быша князи ея яко овни не имущии пажити, и хождаху не с крепостию пред лицем гонящаго. 
7 Заин. Помяну Иерусалим дни смирения своего и отриновений своих, вся вожделения своя, яже имеяше от дний первых, егда падоша людие его в руце стужающаго, и не бе помагающаго ему: видевше врази его посмеяшася о преселении его. 
8 Иф. Грехом согреши Иерусалим, того ради в мятеж бысть: вси славящии его смириша и, видеша бо срам его: сей же стенящь обратися вспять. 
9 Теф. Нечистота его пред ногама его, не помяну последних своих и низведеся пречудно: несть утешаяй его. Виждь, Господи, смирение мое, яко возвеличися враг. 
10 Иод. Руку свою простре стужаяй на вся вожделенная его, виде бо языки вшедшыя во святыню свою, имже повелел еси не входити во церковь Твою. 
11 Каф. Вси людие его воздыхающе ищут хлеба: даша вожделенная своя за пищу, еже бы обратити душу. Виждь, Господи, и призри, яко бых безчестен. 
12 Ламед. Вси, иже к вам проходящии путем, обратитеся и видите, аще есть болезнь, яко болезнь моя, яже бысть: глаголавый о мне смири мя Господь в день гнева ярости Своея. 
13 Мем. С высоты Своея посла огнь, в кости моя сведе его: простре сеть ногама моима, обрати мя вспять, даде мя Господь в погубление, весь день болезнующа. 
14 Нун. Бдяше на нечестия моя, в руку моею сплетошася: взыдоша на выю мою, изнеможе крепость моя, яко даде Господь в руце мои болезни, не возмогу стати. 
15 Самех. Отя вся крепкия моя Господь от среды мене, призва на мя время, еже сокрушити избранныя моя: точило истопта Господь девице, дщери Иудине: о сих аз плачу. 
16 Аин. Очи мои излиясте воду, яко удалися от мене утешаяй мя, возвращаяй душу мою: погибоша сынове мои, яко возможе враг. 
17 Фи. Возде руце свои Сион, несть утешаяй его. Заповеда Господь на Иакова, окрест его врази его: бысть Иерусалим яко осквернена кровоточением в них. 
18 Цади. Праведен есть Господь, яко уста Его огорчих. Слышите убо, вси людие, и видите болезнь мою: девицы моя и юноты отидоша в плен. 
19 Коф. Позвах любители моя, и тии прельстиша мя: жерцы мои и старцы мои во граде оскудеша, яко взыскаша пищи себе, да укрепят душы своя, и не обретоша. 
20 Реш. Виждь, Господи, яко скорблю, утроба моя смятеся во мне, и превратися сердце мое, яко горести исполнихся: отвне обезчади мене мечь, аки смерть в дому. 
21 Шин. Слышаша убо, яко воздыхаю аз, несть утешающаго мя. Вси врази мои слышаша злая моя и порадовашася, яко Ты сотворил еси: привел еси день, призвал еси время, и будут подобни мне. 
22 Фав. Да приидет вся злоба их пред лице Твое, и отреби их, якоже сотвориша отребление о всех гресех моих, яко многа суть стенания моя, и сердце мое скорбит. 

2

1 Алеф. Како омрачи во гневе Своем Господь дщерь Сионю: сверже с небесе на землю славу Израилеву, и не помяну подножия ногу Своею в день гнева и ярости Своея. 
2 Беф. Погрузи Господь и не пощаде: вся красная Иаковля разори яростию Своею, твердыни дщере Иудины изверже на землю, оскверни царя ея и князи ея, 
3 гимель. Сокруши во гневе ярости Своея весь рог Израилев, обрати вспять десницу его от лица врага, разжже во Иакове яко огнь пламы, и потреби вся окрест, 
4 далеф. Напряже лук Свой яко ратник противный, утверди десницу Свою яко супостат и изби вся красная очию моею во селениих дщере Сиони, излия яко огнь ярость Свою. 
5 Ге. Бысть Господь аки враг, погрузи Израиля, погрузи вся домы его, разсыпа вся стены его и умножи дщери Иудине смирена и смирену, 
6 вав. И разверзе аки виноград селение Свое, разсыпа праздники Его: забы Господь, яже сотвори в Сионе праздники и субботы, и озлоби прещением гнева Своего царя и князя и жерца. 
7 Заин. Отрину Господь жертвенник Свой, оттрясе святыню Свою, сокруши рукою вражиею стену забралов его: глас даша в дому Господни яко в день праздника. 
8 Иф. Обратися Господь разсыпати стену дщере Сиони: протяже меру, не отврати руки Своея от попрания: и сетова предградие, и ограда вкупе изнеможе. 
9 Теф. Врастоша в землю врата ея, погуби и сокруши вереи ея, царя ея и князи ея во языцех, несть закона, и пророцы ея не видеша видения от Господа. 
10 Иод. Седоша на земли, умолкоша старейшины дщере Сиони, посыпаша персть на главы своя, препоясашася во вретища, низведоша в землю старейшин дев Иерусалимских. 
11 Каф. Оскудеша очи мои в слезах, смутися сердце мое, излияся на землю слава моя о сокрушении дщере людий моих, внегда оскуде младенец и ссущий на стогнах градских. 
12 Ламед. Матерем своим рекоша: где пшеница и вино? Внегда разслабленым быти им, яко язвеным на стогнах градских, егда изливахуся души их в лоно матерей их. 
13 Мем. Что ти засвидетелствую? Или что уподоблю тебе, дщи Иерусалимля? Кто тя спасет и кто тя утешит, девице, дщи Сионя? Яко возвеличися чаша сокрушения твоего, кто тя изцелит? 
14 Нун. Пророцы твои видеша тебе суетная и безумие и не открыша о неправде твоей, еже возвратити пленение твое, и видеша тебе словеса суетная и изриновения. 
15 Самех. Восплескаша рукама о тебе вси минующии путем, позвиздаша и покиваша главою своею о дщери Иерусалимли, рекуще: сей ли град, венец славы, веселие всея земли? 
16 Аин. Отверзоша на тя уста своя вси врази твои, позвиздаша и поскрежеташа зубы своими и реша: поглотим ю: обаче сей день, егоже чаяхом, обретохом его, видехом. 
17 Фи. Сотвори Господь, яже помысли, сконча словеса Своя, яже заповеда от дний первых: разори и не пощаде, и возвесели о тебе врага, вознесе рог стужающаго ти. 
18 Цади. Возопи сердце их ко Господу, стены дщере Сиони да излиют якоже водотеча слезы день и нощь: не даждь покоя себе, и да не умолкнет зеница очию твоею. 
19 Коф. Востани, поучися в нощи в начале стражбы твоея, пролий яко воду сердце твое пред лицем Господним, воздвигни к Нему руце твои о душах младенец твоих, разслабленых гладом в начале всех исходов. 
20 Реш. Виждь, Господи, и призри, кого еси отребил сице? Еда снедят жены плод утробы своея? Отребление сотвори повар, избиют ли младенцев ссущих сосцы? Убиеши ли во святыни Господни жерца и пророка? 
21 Шин. Успоша на исходищих отрок и старец: девицы моя и юноты мои отидоша в плен, мечем и гладом избил еси, в день гнева Твоего сварил еси, не пощадел. 
22 Фав. Призвал еси яко день праздника пришелствия моя окрест, и не бысть в день гнева Господня уцелевый и оставыйся, яко сотворих возмощи и умножих враги моя вся. 

3

1 Алеф. Аз муж видя нищету (мою) в жезле ярости Его на мя: 
2 поят мя и отведе мя во тму, а не во свет. 
3 Обаче на мя обрати руку Свою весь день, 
4 беф. Обетши плоть мою и кожу мою, кости моя сокруши: 
5 согради на мя и объя главу мою и утруди, 
6 в темных посади мя, якоже мертвыя века: 
7 гимель. Согради на мя, и не изыду, отяготи оковы моя, 
8 и егда воскричу и возопию, загради молитву мою: 
9 возгради пути моя, загради стези моя, возмяте. 
10 Далеф. Бысть яко медведь ловяй, (приседяй ми) яко лев в сокровенных, 
11 гна отступившаго, и упокои мя, положи мя погибша: 
12 напряже лук Свои, и постави мя яко знамение на стреляние, 
13 ге. Пусти в лядвия моя стрелы тула Своего. 
14 Бых в смех всем людем моим, песнь их весь день. 
15 Насыти мя горести, напои мя желчи 
16 вав. И изя каменем зубы моя, напита мя пепелом 
17 и отрину от мира душу мою. Забых благоты 
18 и рех: погибе победа моя и надежда моя от Господа. 
19 Заин. Помяни нищету мою и гонение мое. 
20 Горесть и желчь мою помяну, и стужит во мне душа моя. 
21 Сия положу в сердцы моем, сего ради потерплю. 
22 Иф. Милость Господня, яко не остави мене, не скончашася бо щедроты Его: пребываяй во утриих, помилуй, Господи, яко не погибохом, не скончашася бо щедроты Твоя. 
23 Новая во утриих, многа есть вера Твоя. 
24 Часть моя Господь, рече душа моя: сего ради пожду Его. 
25 Теф. Благ Господь надеющымся Нань: 
26 души ищущей Его благо (есть), и надеющейся с молчанием спасения Божия. 
27 Благо есть мужу, егда возмет ярем в юности своей: 
28 иод. Сядет на едине и умолкнет, яко воздвигну на ся: 
29 положит во прахе уста своя, негли како будет надежда: 
30 подаст ланиту свою биющему, насытится укоризн. 
31 Каф. Яко не во век отринет Господь, 
32 яко смиривый помилует по множеству милости Своея, 
33 не отрину от сердца Своего и смири сыны мужеския. 
34 Ламед. Еже смирити под нозе его вся узники земныя, 
35 еже уклонити суд мужа пред лицем Вышняго, 
36 осудити человека, внегда судитися ему, Господь не рече. 
37 Мем. Кто есть той, иже рече, и быти, Господу не повелевшу? 
38 Из уст Вышняго не изыдет зло и добро. 
39 Что возропщет человек живущь, муж о гресе своем? 
40 Нун. Изыскася путь наш и испытася, и обратимся ко Господу. 
41 Воздвигнем сердца наша с руками к Богу высокому на небеси. 
42 Мы согрешихом и нечествовахом, сего ради не помиловал еси: 
43 самех. Покрыл еси яростию и отгнал еси нас, убил и не пощадел еси: 
44 покрылся еси облаком, да не дойдет к Тебе молитва, 
45 сомжити очи мои и отринути, положил еси нас посреде людий. 
46 Аин. Отверзоша на ны уста своя вси врази наши. 
47 Страх и ужас бысть нам, надмение и сокрушение: 
48 исходища водная излиет око мое о сокрушении дщере людий моих. 
49 Фи. Око мое погрязну: и не умолкну, еже не быти ослаблению, 
50 дондеже приклонится и увидит Господь с небесе. 
51 Око мое закрывается о души моей, паче всех дщерей града. 
52 Цади. Ловяще уловиша мя яко врабия врази мои туне: 
53 умориша в рове жизнь мою и возложиша на мя камень. 
54 Возлияся вода выше главы моея: рех: отриновен есмь. 
55 Коф. Призвах имя Твое, Господи, из рова преисподняго: 
56 глас мой услышал еси: не покрый ушес Твоих на мольбу мою: 
57 на помощь мою приближился еси, в день, в оньже призвах Тя, рекл ми еси: не бойся. 
58 Реш. Судил еси, Господи, прю души моея, избавил еси жизнь мою: 
59 видел еси, Господи, смятения моя, разсудил еси суд мой: 
60 веси все отмщение их и вся помышления их на мя. 
61 Шин. Слышал еси укоризны их, вся советы их на мя, 
62 устне востающих на мя и поучение их на мя весь день, 
63 седение их и востание их: призри на очи их. 
64 Фав. Воздаси им, Господи, воздаяние по делом руку их: 
65 воздаси им заступление, сердца моего труд. 
66 Ты их проженеши во гневе и потребиши их под небесем, Господи. 

4

1 Алеф. Како потемне злато, изменися сребро доброе: разсыпашася камыцы святыни в начале всех исходов. 
2 Беф. Сынове Сиони честнии, одеянии златом чистым, како вменишася в сосуды глиняны, дела рук скудельничих. 
3 Гимель. Еще же змиеве обнажиша сосцы, воздоиша скимни их дщерей людий моих в неизцеление, якоже птица во пустыни. 
4 Далеф. Прильпе язык ссущаго к гортани его в жажди, младенцы просиша хлеба, и несть им разломляющаго. 
5 Ге. Ядуще сладостная погибоша во исходех, питаемии на багряницах одеяшася в гной. 
6 Вав. И возвеличися беззаконие дщере людий моих паче беззакония Содомска, превращенныя во окомгновении, и не поболеша о ней руками. 
7 Заин. Очистишася назорее ея паче снега и просветишася паче млека, чермни быша, паче камене сапфира усечение их. 
8 Иф. Потемне паче сажи вид их, не познани быша во исходех: прильпе кожа их костем их, изсхоша, быша яко древо.
9 Теф. Лучше быша язвении мечем, нежели погублени гладом: сии бо истлеша от неплодности земли. 
10 Иод. Руце жен милосердых свариша дети своя, быша в ядь им, в сокрушении дщере людий моих. 
11 Каф. Сконча Господь ярость Свою, излия ярость гнева Своего и возжже огнь в Сионе, и пояде основания его. 
12 Ламед. Не вероваша царие земстии и вси живущии во вселенней, яко внидет враг и стужаяй сквозе врата Иерусалимская, 
13 мем. Ради грех пророков его и неправд жерцев его, проливающих кровь праведну посреде его. 
14 Нун. Поколебашася бодрии его на стогнах, осквернишася в крови, внегда немощи им, прикоснушася одежд своих.
15 Самех. Отступите от нечистых, призовите их: отступите, отступите, не прикасайтеся, яко возжгошася и восколебашася: рцыте во языцех: не приложат, еже обитати (с ними). 
16 Аин. Лице Господне часть их, не приложит призрети на них: лица жреческа не устыдешася, старых не помиловаша. 
17 Фи. Еще сущым нам оскудеша очи наши, на помощь нашу всуе смотрящым нам, внегда надеяхомся на язык не спасающь. 
18 Цади. Уловиша малых наших еже не ходити на стогнах наших, приближися время наше, исполнишася дние наши, настоит конец наш. 
19 Коф. Скорейшии быша гонящии ны паче орлов небесных, на горах гоняху нас, в пустыни приседоша нам. 
20 Реш. Дух лица нашего, помазанный Господь ят бысть в растлениих их, о немже рехом: в сени его поживем во языцех. 
21 Шин. Радуйся и веселися, дщи Идумейска, живущая на земли, и на тебе приидет чаша Господня, и упиешися и излиеши. 
22 Фав. Скончася беззаконие твое, дщи Сионя, не приложит ктому преселити тя: посетил есть беззакония твоя, дщи Едомля, откры нечестия твоя. 

5

1 Молитва Иеремии пророка. Помяни, Господи, что бысть нам: призри и виждь укоризну нашу: 
2 достояние наше обратися к чуждим и домы нашя ко иноплеменником: 
3 сири быхом, несть отца, матери нашя яко вдовы. 
4 Воду нашу за сребро пихом, дрова наша за цену куповахом: 
5 на выя нашя гоними быхом, трудихомся, не почихом. 
6 Египет даде руку, Ассур в насыщение их. 
7 Отцы наши согрешиша, и несть их, мы же беззакония их подяхом. 
8 Раби обладаша нами, избавляющаго несть от руку их. 
9 В душах наших носихом хлеб наш, от лица меча в пустыни. 
10 Кожа наша аки пещь обгоре, разседошася от лица бурей глада. 
11 Жен в Сионе смириша, девиц во градех Иудиных. 
12 Князи в руках их повешени быша, старейшины не прославишася. 
13 Избраннии плачь подяша, и юноши в кладе изнемогоша. 
14 И старцы от врат оскудеша, избраннии от песней своих умолкоша. 
15 Разсыпася радость сердец наших, обратися в плачь лик наш, 
16 спаде венец со главы нашея: горе нам, яко согрешихом. 
17 О сем смутися сердце наше, о сем померкнуша очи наши. 
18 На горе Сионе, яко погибе, лисицы ходиша. 
19 Ты же, Господи, во веки вселишися, престол Твой в род и род. 
20 Вскую во веки забываеши нас, оставиши ли нас в продолжение дний? 
21 Обрати ны, Господи, к Тебе, и обратимся, и вознови дни нашя якоже прежде. 
22 Яко отревая отринул еси нас, разгневался еси на ны зело. 

Послание Иеремии.

Послание Иеремии. Славянский текст. 1

1 Списание послания ко отводимым пленником в Вавилон от царя Вавилонскаго, еже посла Иеремиа, возвестити им, якоже повелено бысть ему от Бога. 
2 Грех ради, имиже согрешисте пред Богом, отведетеся в Вавилон пленени Навуходоносором царем Вавилонским. 
3 Вшедше убо в Вавилон, будете тамо лета многа и время долго, до седми родов: потом же изведу вас оттуду с миром. 
4 Ныне же узрите в Вавилоне боги сребряны и златы, и каменны и древяны на раменах носимы, показующыя страх языком. 
5 Блюдитеся убо, да не и вы иноплеменником уподобитеся, и страх приимет вас от них: видевше народ напреди и созади их кланяющься им, рцыте убо во уме: Тебе лепо есть кланятися, Владыко! 
6 Ангел бо Мой с вами есть, сей взыскует душ ваших. 
7 Язык бо их изстроган есть древоделею, тии же позлащени и посребрени, лживи же суть и не могут глаголати, 
8 и якоже девице красотолюбивей вземлюще злато, устрояют венцы на главы богов своих. 
9 Темже украдают от них жерцы злато и сребро и себе употребляют. 
10 Дадят же от них и блудницам сущым в дому, а боги украшают аки человеков ризами, боги златыя и сребряныя и древяныя. 
11 Тии же не уцелеют от ржи и молия, одеют же я в багряницу. 
12 Отирают лица им праха ради, иже от храма, иже есть множайший на них. 
13 И скипетр имут, яко человек и яко судия страны, иже согрешающаго к себе не убиет. 
14 Имать же и мечь в деснице и секиру, сам же себе от рати и от разбойник не отимет: отсюду знаеми суть, яко не суть бози: не убойтеся убо их. 
15 Якоже бо сосуд человеческ сокрушен непотребен бывает, 
16 тацы суть бози их: егда же поставлени будут в домех, очи их полны суть праха от ногу входящих. 
17 И якоже кому преобидевшу царя, заключени бывают дворы, или яко на смерть отводиму, храмы их утверждают жерцы дверьми и замками и заворами, да от разбойник окрадени не будут. 
18 Светила жгут им, и множае неже себе, от нихже ни едино могут видети. 
19 Суть убо яко бервна в дому, сердца же их точат черви, иже от земли, и одежду их, они же не чувствуют сего. 
20 Очернело есть лице их от дыма храмины: 
21 по телесем их и по главе парят нетопыри нощнии, и ластовицы и птицы, такожде и котки (скачут). 
22 От того увесте, яко не суть бози не убойтеся убо их. 
23 Злато бо лежащее на них на красу, аще не очистит кто от ржи, не возблистают: егда бо сливаху их, не чувствоваша. 
24 За всяку цену куплени суть, в нихже несть духа. 
25 Без ног на рамех носятся, являюще свое безчестие человеком, осрамляются же и служащии им: 
26 занеже, егда когда падутся на землю, и не могут сами востати: и аще кто поставит я прямо, не могут поступити, и аще преклонятся, не могут исправити себе, но яко мертвецем дары им полагают. 
27 Требы же их продающе жерцы на зло употребляют: такожде и жены их варят от них, ни единому же убогу, ни немощну подают: 
28 треб их нечистыя и кровоточныя жены прикасаются. Уразумевше убо от сих, яко не суть бози, не бойтеся их. 
29 Откуду бо прозовутся бози, яко жены служат богом сребряным и златым и древяным? 
30 И во храмех их жерцы седают, имуще ризы растерзаны и главы и брады обриты, ихже главы не покровены суть: 
31 ревут же вопиюще пред боги своими, якоже нецыи на вечери мертвеца. 
32 От риз их вземлюще жерцы, одевают жены своя и дети. 
33 И аще от кого зло постраждут или добро, не могут отдати: ни царя могут поставити, ни отяти: 
34 такожде ни богатства ни меди могут дати. Аще кто им что обещав не отдаст, не воспросят. 
35 От смерти человека не избавят, ни менша от крепка не отимут: 
36 человека слепа к видению не навратят, в нужди человеку не помогут, 
37 вдовы не помилуют и сироте добра не сотворят. 
38 Подобни суть камению нагорному бози их древяни и каменни, и позлащени и посребрени, служащии же им посрамятся. 
39 Како убо мощно мнети или прозвати я богами? 
40 Ктому же и сами тии Халдее не чтут их: иже егда узрят нема не могуща глаголати, приносят его к Вилу, емуже молятся, да глаголет, аки сильну сущу почути. 
41 И не могут тии разумевше сие оставити я, чувства бо не имут. 
42 Жены же обложены ужами на распутиих седят, кадящя отребы. 
43 Егда же которая от них привлечена от некоего мимоходяща будет с ним, ближнюю укаряет, яко не сподобилася якоже и она, ни уже ея преторгнулося. 
44 Вся бываемая в них лжива суть: како убо мощно мнети или прозывати я богами быти? 
45 Древоделями и златари сотворени суть: ничтоже ино бывают, но еже хотят художницы, то бывают. 
46 И сами, иже их творят, не бывают долговечни. 
47 Како убо сотворенная ими могут быти бози? Оставиша бо по себе лжу и укоризну потом будущым: 
48 егда бо приидет на них рать и злая, совещавают между собою жерцы, где скрыются с ними. 
49 Како убо несть чувствовати, яко не суть бози, иже не избавляют себе от рати, ни от зла? 
50 Древяни суще и каменни, и позлащени и посребрени, познаются потом языком всем, яко лжа суть: и царем явни будут, яко не суть бози, но дела рук человеческих, и ни едино дело Божие в них есть: 
51 кому убо несть разумно, яко не суть бози? 
52 Царя бо стране не поставляют, ни дождя человеком подают, 
53 ни суда разсудят и не избавят от обиды, немощни суще: 
54 якоже бо враны между небом и землею суть: и егда падет огнь на храме богов древяных или каменных, или позлащеных или посребреных, жерцы их избегнут и уцелеют, они же яко бервна посреде сгорят. 
55 Царю же и ратным не станут противу: убо како мощно мнети или прияти, яко бози суть? 
56 Ни от разбойник, ни от татей избавят себе бози древяни и каменни, и посребрени и позлащени. 
57 Ухже преодолевше и вземше злато и сребро и ризы их, отидут, ниже сами себе помогут. 
58 Темже лучше есть царь показуяй свое мужество, или сосуд в дому потребен, егоже употребляет владяй им, нежели лживии бози: или дверь в дому стрегущи яже в нем, нежели лживии бози: и древяный столп в дому царстем, нежели лживии бози. 
59 Солнце бо и луна и звезды, светлы суще и посылаемы на потребу, благопослушливы суть. 
60 Такожде и молния, егда блистает, благовидна есть: такожде и ветр во всей стране веет. 
61 И облаком егда повелится от Бога ити на всю вселенную, совершают повеленное. 
62 Огнь же пущен свыше истребити горы и дубравы творит повеленное: сии же ни образом, ниже силам их уподоблени суть. 
63 Темже ни мнети мощно, ни прозывати их быти боги, не сильным им сущым ни прю разсудити, ни добра сотворити человеком. 
64 Разумевше убо, яко не суть бози, не бойтеся их. 
65 Ни царей бо прокленут, ниже благословят. 
66 Знамения же на небеси и во языцех не покажут: ни просветят яко солнце, ни осветят яко луна. 
67 Зверие лучше их суть, иже могут, избеге под кров, себе пользовати. 
68 Ни единым убо образом есть нам яве, яко суть бози: темже не бойтеся их. 
69 Якоже бо во овощнице пужало ничесоже хранит, такожде и бози их суть древяни и каменни, и посребрени и позлащени. 
70 Тем же образом и хвраст, иже во ограде, на немже вся птицы седают: такожде и мертвецу повержену во тме подобни суть бози их, древяни, позлащени и посребрени. 
71 От багряницы, (в нюже одеяни,) и от мрамора, иже на них плеснивеет, познайте, яко не суть бози: тии бо последи изядени будут от червия и будут во укоризну во стране. 
72 Лучше убо есть человек праведен не имеяй кумиров, будет бо далече от укоризны.